Batys Qazaqstan oblysynda polısııa departamentiniń bastamasymen «Oral – esirtkisiz qala» atty baǵdarlama bastalǵanyn budan buryn habarlaǵan edik. Jaqynda tártip saqshylary eriktilermen birge esirtki jarnamalaryn joıý aksııasyn ótkizdi.
Ádette esirtki satýmen aınalysatyn toptar óz jarnamasyn áleýmettik jelide, qala ǵımarattarynda graffıtı sýretter arqyly jasaıdy. Osyǵan oraı jaqynda Batys Qazaqstan oblysy Polısııa departamenti esirtki jarnamalaryn óshirý boıynsha reıd uıymdastyrdy. Sharaǵa 150-den asa adam qatysty. Olardyń arasynda polısııanyń Esirtki qylmysyna qarsy is-qımyl basqarmasy men qalalyq bólimder qyzmetkerleri, joǵary oqý oryndary stýdentteri, «Ǵasyr» jastar qoǵamdyq birlestigi ókilderi, qala eriktileri, sondaı-aq «Oral – esirtkisiz qala» monıtorıngtik tobynyń músheleri boldy.
– Jastar arasynda nashaqorlyq máselesi óte ózekti bolyp tur. Ásirese sıntetıkalyq esirtkiniń jańa túrleri keń taralýyna alańdaımyz. О́ńirde esirtki qylmysy azaıar emes. Tipti kámeletke tolmaǵandardy esirtki bıznesine tartý faktileri de kezdesedi. Sondyqtan esirtkimen kúresý – barshamyzdyń ortaq mindetimiz. Biz jaqynda beınebaqylaý kameralarynyń kómegimen Aqsaı qalasynda esirtki jarnamalaǵan eki jasóspirimdi ustadyq. Olar 7 jylǵa deıin bas bostandyǵynan aıyrylýy múmkin. Aınalaıyn, jastar, barlyǵyńyzǵa aıtarym, osy zulymdyqpen birge kúreseıik. Bul dertke qoǵam bolyp qarsy turǵanda ǵana balalarymyzdyń esirtkisiz bolashaǵyn jasaı alamyz, – dedi aksııaǵa kelgen oblystyq Polısııa departamentiniń bastyǵy, polısııa polkovnıgi Arman Orazalıev.
Reıd barysynda is-sharaǵa qatysýshylar 24 baǵyt boıynsha topqa bólinip, qala aýmaǵynda 100-ge jýyq jarnamany joıyp shyqty.
– Bul aksııa esirtki saıttary men esirtkiniń zańsyz aınalymyn nasıhattaıtyn jazýlar men sýretterdi joıý maqsatynda ótkizilip otyr. Kóp jastar esirtki satatyn ınternet-dúkenderdiń graffıtıin, sýretterin, japsyrmalaryn taratýǵa tartylyp jatyr. Olar bul áreketiniń zańmen qýdalanatynyn bilmeýi de múmkin. Biz bunyń qylmystyq quqyq buzýshylyq ekenin eskertemiz, – deıdi Esirtki qylmysyna qarsy is-qımyl basqarmasynyń bastyǵy, polısııa podpolkovnıgi Marat Súgirov.
Qazirgi tańda esirtki satýshylar «taýaryn» ótkizýdiń san aılasyn jasaıdy. Sıntetıkalyq zattyń jarnamasy kóptegen saıtta, áleýmettik jelide júr. Keıbireýlerge esirtki zatyn tasymaldaý, taratý jeńil tabys kózi sııaqty kórinýi múmkin. Alaıda elimizde esirtki quraldaryn, psıhotroptyq zattardy, sol tektesterdi nasıhattaǵany jáne zańsyz jarnamalaǵany úshin Qylmystyq kodekstiń 299-1-baby boıynsha qylmystyq jaýapkershilik kózdelgen.
Polısııa qyzmetkerleri esirtki zattarynyń graffıtı-jarnamasyna kýá bolǵandardyń dereý «102» operatoryna habarlasýyn suraıdy.
Batys Qazaqstan oblysy