Suńqar Sákenniń jańa tuǵyry

Bıiktigi bir metrden asatyn tuǵyrdy tolyǵymen úsh metrge bıiktetip, ony granıt taspen qaptaǵan. Odan bólek, aqyn bıýsti qola túsine boıalǵan. Eskertkishtiń aınalasy abattandyrylǵan. Mańaıyna tas tóselip, oryndyqtar, jaryq baǵandary men jańa qorshaý qoıyldy.

– Sapaly materıaldar paıdalanyldy, kún batareıalarymen qýattanatyn jaryqtandyrý jáne oryndyqtar ornatyldy. Buryn jazýshynyń áke-sheshesi turǵan úıdiń aýmaǵy da abattandyryldy. Qazir onda úıdiń tek irgetasy ǵana qalǵan. Endi tozǵan tusy qaıtadan quıylyp, ákteldi. Úıdiń janyndaǵy memorıaldyq taqta da jańartyldy, – deıdi Ortaý aýyldyq okrýginiń ákimi Dosan Qýanyshbek.

Qaıta jańǵyrtylǵan eskertkishtiń saltanatty ashylýyna oraı belgili ǵalymdar, aqyn, jazýshylar jınalyp, qaıratker rýhyna qurmet kórsetti.

– Osydan on jyl buryn Sáken Seıfýllınniń 120 jyldyq mereıtoıy aıasynda Qarashilik qystaýynda alǵash ret konservasııalyq jáne abattandyrý jumysy júrgizildi. Qystaýdyń ornyn zertteý barysynda úıdiń irgetasy tolyq ashylyp, qaıta qalpyna keltirildi. Qystaýǵa konservasııalyq jumys júrgizilip, tolyqtaı qorshalyp, bel­gitas qoıyldy. Bıyl mine, Qaraǵandy oblystyq maslıhatynyń depýtaty Rysqalı Ábdikerovtiń bastamasymen Sáken Seıfýlınniń 130 jyldyq mereıtoıyna baılanysty aqynnyń týǵan jeri Qarashilik qystaýyn da qalpyna keltirý, abattandyrý jumysyn júr­gizýge oblys bıýdjetinen 50 mln teńge qarajat bólindi. Bul jumysty júr­gizýge jobalyq smetalyq qujattar daıyndalyp, barlyq jumys osy qu­jat aıasynda atqaryldy, – deıdi ob­lystyq tarıhı-mádenı murany saqtaý ortalyǵynyń basshysy Túlkibaı Tó­leýov.

Eń alǵash Seıfollanyń Qarashi­liginde hám Ortaý aýylynda aqynnyń eki birdeı músinin qalyptaýshy – sýretshi, músinshi Jaqsybaı Qalıaqpar edi. Ol 1992 jyl-tyn. Arada otyz jyldan asa ýaqyt ozyp, suńǵyla Sákenniń sulý beınesi jańa tastuǵyrǵa qondy. Endi baba rýhyna taǵzym etýge kelgender Qarashilik qystaýynyń tunyp turǵan tarıhymen tanysa alady.

Qaraǵandy oblysy,

Shet aýdany,

Ortaý aýyly