Referendým – halyqtyń tańdaý múmkindigi. Bul múmkindikti Qaraǵandy oblysy qalt jibermedi. Saıası naýqanda belsendilik tanytyp, kúndizgi esep boıynsha tipti kósh bastady. Referendým 650 ýchaskede ótip, buǵan tirkelgen 760 myńnan asa turǵyn daýys berdi.
Referendým kezinde 664 komıssııa, onyń ishinde oblystyq, aýmaqtyq jáne ýchaskelik komıssııa quramynyń da eńbegin aıta ketken jón. Daýys berý úderisin táýelsiz baqylaýshylar – qoǵamdyq birlestikterdiń ókilderi qadaǵalap shyqty.
Referendým ashyqtyǵyn baqylaıtyn halyqaralyq baıqaýshylar toby da óz jumysyn tyńǵylyqty atqardy. Baıqaýshylardy Qaraǵandydaǵy Kenshiler mádenıet saraıynda ornalasqan №17 referendým ýchaskesinde keziktirip qaldyq. TMD baıqaýshylar komıssııasynyń múshesi Dmıtrıı Mıhaılov referendýmda eshqandaı zań buzýshylyq tirkelmegenin basa aıtty.
«Biz tús aýǵansha alty ýchaskede boldyq. Eshqandaı eskertý jasaǵan joqpyz. Bári zań aıasynda ótip jatyr. Biz aýyldyq jáne qalalyq jerlerge baqylaý júrgizdik. Tańdaý jasaýshylardyń qatary qalyń. Kóńil kúıi de tamasha. Jas erekshelikteri árqıly», dedi baıqaýshy.
Aýdan, aýyldaǵy referendým ýchaskeleri de talapqa saı jumysyn atqaryp, eliniń erteńine beıjaı qaramaıtynyn tanytyp, halyq belsendiligin kórsetti. Ásirese naýqannyń tańǵy ýaqytynda Shet aýdanynyń daýys berýshileri oq boıy ozyq boldy.
«Elimiz úshin mańyzdy sheshim qabyldaý maqsatynda aýdan turǵyndary erte turdy. Ony daýys berýge kelgen adamdardan ańǵarýǵa bolady. Aýdanda 51 referendým ýchaskesi bar. Barlyǵy talapqa saı jabdyqtalyp, komıssııa quramy bekitilgen», deıdi Shet aýdandyq referendým komıssııasynyń tóraǵasy Berikbol Dáýletuly.
Sondaı-aq Nura aýdanyndaǵy №615 referendým ýchaskesine kımeshek kıip barǵan «Aq ájeler» hory tańdaý jasap, merekelik qýanysh syılady. Daýys berýge kelgender kelisti ájelermen sýretke tústi.
Aıtpaqshy, Qaraǵandydaǵy №41 referendým ýchaskesine dınozavr bolyp kıinip kelgen daýys berýshi jurtty súısindirdi. Onyń qımyl-qozǵalysy, ásirese daýys berý aımaǵyna boıy syımaı, sonda da talpynyp kirgen sáti ýchaskedegilerdiń júzine kúlki úıirip, bir kóterińki kóńil kúı syılady. Sóıtsek, daýys berý quqyna alǵash ıe bolǵan Ernar esimdi Qaraǵandy turǵyny eken.
Sondaı-aq Balqash qalasynda otbasy qurǵan jas jubaılar Ernar Erbolatuly men Arýjan Sháımerden azamattyq mindetin oryndaýǵa №192 referendým ýchaskesine kelip, daýysyn berdi. Erli-zaıypty ekeý tarıhı kúni nekesin qıyp qana qoımaı, biraýyzdan saıası naýqannan qalys qalmaýǵa sheshim qabyldaǵan. О́ıtkeni ózderiniń bolashaǵy biz bergen daýysqa da baılanysty deıdi.
Qaraǵandy oblysy