Kúzdiń janǵa jaıly, sharýaǵa qolaıly qońyrjaı kúnderi búkil oblys kólemin qamtyǵan senbilikter, ekoaksııalar júrip jatyr. 8 qazanda Qostanaı qalasy men Áýlıekól, Fedorov, Qarasý aýdandarynda saıabaqtar men turǵyn úı aýlalary, kósheler kúzgi japyraqtardan arshylyp, ózen-kól jaǵalaýlary tazartyldy.
Kóp bolyp qolǵa alynyp jatqan tazalyq aksııalaryna jergilikti atqarýshy bılik ókilderi, tabıǵat janashyrlary, qoǵamdyq birlestikter, erikti jastar, belsendi turǵyndar atsalysyp jatyr. Ekologııalyq is-sharalardyń deni turǵyndardy tazalyqqa, qorshaǵan ortany aıalap ustaýǵa, tabıǵatty qorǵaýǵa úndeıtin kóńildi oıyn, baıqaý, festıval túrinde ótip, keıde buqaralyq sport jarystaryna da ulasyp ketedi.
«Taza Áýlıekól» ekoaksııasy aıasynda Áýlıekól aýylynyń úlken-kishisi bir kisideı jumylyp, kóshe sypyryp, ortalyq saıabaqty, birneshe alleıany japyraqtan tazartty. Biraz sharýanyń basyn qaıyryp tastaǵan soń turǵyndar 3 shaqyrym qashyqqa júgirýden jarysty. 14 jasqa endi tolǵan jas balalar da, seksendi alqymdap qalǵan qarııalar da qalyspaı júgirgen kóńildi jarystan keıin shaǵyn ǵana merekelik jıyn ótip, jeńimpazdarǵa, aýyl tazalyǵyn saqtaýǵa únemi atsalysyp júrgen jastarǵa, zeınetkerlerge aýdan ákiminiń Alǵyshaty tabys etildi.
Aýdandyq TKSh bóliminiń bastyǵy Egor Chernovtyń aıtýynsha, Áýlıekól aýdanynda «Taza Qazaqstan» ekoaksııasy bastalǵan sáýir aıynan beri arnaıy polıgonǵa 9 220 tonna qoqys shyǵarylyp, qyryqtan astam zańsyz qoqys úıindisi joıylǵan.
«3 260 aýlany abattandyrdyq, ıesiz qalǵan 46 ǵımarat buzyldy, 40 000 sharshy metrden astam jerdiń shóbi shabyldy, 11,5 km
qorshaý ornatyldy, «Taza Qazaqstan» ekologııalyq baǵdarlamasy aıasyndaǵy senbilikterge 6342 adam qatysty, 102 tehnıka jumyldyryldy. Ortalyq alańdar abattandyrylyp, 2 sýburqaq jóndeldi. Al búgingi «Taza Áýlıekól» sporttyq ekoaksııasy aýdan turǵyndaryn taza ortada ómir súrýge shaqyrý, ekologııalyq mádenıetti qalyptastyrý maqsatynda ótip jatyr», deıdi TKSh bastyǵy.
Dál osy kúni Fedorov aýdanynyń Bannov aýylyndaǵy Toqtas kólinde «Taza jaǵalaý» ekologııalyq aksııasy ótti. Bul is-sharaǵa qatysqan 200-den astam turǵyn on shaqty topqa bólinip kóldiń jaǵasyn, aýylǵa kireberis joldardyń bárin tazartyp shyqty. Aksııa barysynda turǵyndar plastıkalyq bótelkelerdi, paketter men basqa da qatty qaldyqtardy qosa alǵanda, shamamen 1,5 tonna qoqys jınady.
«Bul aksııa kóp bolyp jumyla bilsek, úlken kúshke aınalatynymyzdy kórsetip berdi. Búgin aýylǵa tıip turǵan ásem kóldiń jaǵalaýyn tazalap edik, aınalamyz múlde basqasha keıipke enip, túrlenip shyǵa keldi. Bul eń aldymen ózimizge jaqsy emes pe?», deıdi aýdandyq máslıhattyń depýtaty Alekseı Baınazarov.
Qarasý aýdanynda ótip jatqan senbilikter, eko-kvest, sanıtarlyq tazalaý, eldi mekenderdi abattandyrý jumystary da – kópke úlgi. Qazannyń segizinde atalǵan aýdanǵa qarasty Chernıaev aýyldyq okrýginiń aqsaqaldary senbilikke shyqty.
«О́z aýylymyzdyń aınalasyn taza ustaýǵa bolady ǵoı. Kóptiń kúshimen bitetin mundaı is-sharalardyń jalpy aýyl turǵyndarynyń yntymaǵyn arttyrýǵa, keıingi jastardyń úlgi-ónege alýyna septigin tıgizedi. Sondyqtan «Taza Qazaqstan» aksııasy bizdiń okrýgte, jalpy aýdan kóleminde apta saıyn ótip turatyn bolady», deıdi aýdandyq ardagerler keńesiniń tóraǵasy Nurtan Aqshalov.
Aýyl aqsaqaldarynyń bastamasy kópshilik qoldaýyna ıe bolyp, júzden astam turǵyn ekoaksııaǵa atsalysty. О́nerpazdar án salyp, kúı áýeletse, jergilikti sharýashylyqtar kóshe ashanasyn uıymdastyryp, dastarqanǵa ystyq shaı, dámdi taǵamdaryn jaıyp qoıdy.
Bul kúni qostanaılyqtar da qarap qalǵan joq. Oblys ákimi Qumar Aqsaqalov bastaǵan óńir belsendileri Arystanbekov kóshesi boıynda ornalasqan saıabaqqa aǵash otyrǵyzdy. Taıaýda ǵana bul kóshedegi bos jatqan aýmaq abattandyrylyp, jańa shaǵyn saıabaq ashylǵan. Jańa saıabaqta sport alańqaıy salynyp, turǵyndar demalysyna qolaıly jaǵdaı jasalǵan. Jaqyn arada bul mańda balalarǵa arnalǵan oıyn alańy men qoǵamdyq dárethana iske qosylady.
«Memleket basshysynyń «Taza Qazaqstan» baǵdarlamasy Qostanaı oblysynda belsendi júzege asyp jatyr. Jyl basynan beri ruqsat etilmegen 185 qoqys polıgony joıyldy. Sondaı-aq 86 myńnan asa aǵash otyrǵyzyldy. Oblystyq bıýdjetten abattandyrý jumystaryn atqarýǵa 11 mlrd teńgeden astam qarjy bólindi. Nátıjesinde, 327 saıabaq pen skver tazartylyp, qalypqa keltirildi. Munyń syrtynda, sol qarjynyń kómegimen jańadan saıabaqtar ashylyp jatyr. Oblys ortalyǵy bolǵandyqtan, árıne, Qostanaı qalasyna erekshe kóńil bólinedi. Bıyl «Trıatlon-parkti» qalypqa keltirdik. Tobyl ózeniniń jaǵalaýy retteldi. Ol mań qazir turǵyndar men qala qonaqtary demalatyn óte qolaıly ári kórikti orynǵa aınaldy. Ortalyq saıabaqta da 200 mln teńgege biraz jumys atqaryldy. Bul baǵyttaǵy jumys keler jyly da jalǵasady. Eskirgen atraksıondardyń ornyna jańa zamanaýı atraksıondar qoıylatyn bolady», dedi oblys ákimi.
Qostanaı oblysy