Almatyda áskerı-tehnıkalyq mektep alańynda 118 túlektiń saltanatty áskerı ant qabyldaý rásimi ótti, dep habarlaıdy Egemen.kz.
Qorǵanys mınıstrliginiń málimetinshe, mektep oqýshylary barlaýshy, ushqyshsyz basqarylatyn qurylǵy operatory, zenıtshi, barlaýshy hımık, radıasııalyq jáne hımııalyq barlaý salasynyń mamany sııaqty mamandyqtar boıynsha oqýdy aıaqtap otyr. Úzdik túlekter alǵys hattarmen marapattaldy.
Kýrsanttar ushqyshsyz basqarylatyn qurylǵylary basqarý, drondardy anyqtaý-joıý turǵysynda jáne ınjenerlik daıyndyq elementteri boıynsha óz sheberlikterin kórsetti.
«Osynda oqyp júrgende árqaısymyzǵa jańa dúnıeniń esigi ashylǵandaı boldy. Men barlaý hımıgi mamandyǵyn meńgerdim. Munda alǵan bilim men daǵdylar azamattyq salada da kádege jararyna senimdimin», dedi túlek Máýlen Nurdáýlet.
Aıta ketsek, Almaty áskerı-tehnıkalyq mektebin jyl saıyn 700-den astam túlek támamdaıdy. Oqý orny eki baǵdarlama boıynsha – azamattardy Qarýly kúshterdegi qyzmetke tegin daıyndaıdy jáne rezervti qalyptastyrý úshin aqyly oqytady. Atalǵan mektep – armııada da, azamattyq ómirde de suranysqa ıe 28 mamandyq boıynsha bilim beredi.