Qasym-Jomart Toqaev elordada qysqa merzimde boı kótergen órt sóndirý bóliminiń jumysymen tanysty. Mundaǵy órt sóndirýshiler 96 myńnan astam turǵyny bar Almaty aýdanyna qyzmet kórsetedi, dep habarlaıdy Egemen.kz Aqordanyń baspasóz qyzmetine silteme jasap.
Bólimniń órt qaýipsizdigin qamtamasyz etý aýmaǵyna «Ońtústik-Shyǵys» turǵyn alaby, sondaı-aq Beıbitshilik jáne kelisim saraıy, Táýelsizdik saraıy, Áziret Sultan meshiti jáne «Nurly jol» vokzaly sııaqty mańyzdy nysandar kiredi. О́rt sóndirýshiler jumysyn bastaǵan eki aı ishinde 200-ge jýyq dabylǵa jedel shyǵyp úlgergen.
Sapaly ári tez qurastyrylatyn modýldi materıaldardan salynǵan órt sóndirý deposy fýnksıonaldyq turǵydan óte qolaıly. Ǵımaratta jumys, dıspetcherlik, demalys bólmeleri, oqý synyby jáne as úı qarastyrylǵan. Jabyq turaqqa alty arnaıy tehnıka syıady.
Prezıdentke órt sóndirý jáne qutqarý operasııalaryna arnalǵan zamanaýı jabdyqtar kórsetildi. Sonymen qatar bıik ǵımarattardaǵy órtti óshirýge paıdalanylatyn drondardyń jumysy tanystyryldy.
Memleket basshysy órt sóndirý bóliminiń qyzmetkerlerimen sóılesip, osyndaı zamanaýı modýldi órt sóndirý depolary elimizdiń barlyq óńirine qajet ekenin jáne atalǵan jobanyń aıasy keńeıtiletinin jetkizdi. Prezıdenttiń aıtýynsha, órt sóndirýshiler men qutqarýshylardyń áleýmettik máselelerin sheshý jáne baspanamen qamtý jumystary jalǵasady.
Qasym-Jomart Toqaev jańadan salynǵan eki qabatty jataqhanany aralap kórdi. Sondaı-aq jataqhanaǵa qonystanǵan órt sóndirýshilerdiń otbasylaryn quttyqtady.
Budan keıin № 23 jańa órt sóndirý bólimine sport jabdyqtaryn syıǵa tartty.