Osy oqý jylynyń basynan beri balabaqshalarda 35,7 myń jańa oryn paıda boldy. Sonyń ishinde 11 600 oryn – memlekettik, 25 600 oryn – jekemenshik mektepke deıingi uıymda ashylyp otyr. Bul týraly Prezıdent janyndaǵy ortalyq kommýnıkasııalar qyzmetinde ótken brıfıngte aıtyldy.
Baspasóz jıynynda sóz alǵan Oqý-aǵartý mınıstrligi Mektepke deıingi bilim departamentiniń dırektory Manar Adamova 2027 jylǵa deıin 300 myńǵa jýyq jańa oryn ashý josparlanǵanyn jetkizdi.
«2 jastan 6 jasqa deıingi balalardy mektepke deıingi tárbıe jáne oqytýmen qamtýdy ulǵaıtý maqsatynda mınıstrlik Mektepke deıingi uıymdar jelisin kóbeıtý jóninde birqatar shara qabyldady. Jergilikti atqarýshy organdar mınıstrlikpen kelise otyryp jańa mektepke deıingi uıymdar (MDU) jáne jańa oryndardy engizýdiń qadamdyq josparlaryn bekitti. Soǵan sáıkes 2023 jyldan 2027 jylǵa deıin 300 myńǵa jýyq jańa oryn ashý josparlanǵan. Jyl basynan beri 35,7 myń jańa oryn ashyldy. Jańa oryndardy ashý jumys istep turǵan mektepke deıingi uıymdardy qaıta qurylymdaý, jańadan salý, shaǵyn ortalyqtar jelisin keńeıtý, sondaı-aq jekemenshik mektepke deıingi uıymdarda memlekettik bilim berý tapsyrysyn ornalastyrý esebinen júzege asyrylyp jatyr. Búginde balalardy qamtýdyń eń joǵary kórsetkishine Pavlodar oblysy qol jetkizip otyr», dedi spıker.
M.Adamovanyń aıtýynsha, bıyl mektep jasyna deıingi balanyń jeke damý kartasy sıfrly formatqa kóshirildi. Bul balalar daǵdylarynyń damýy men qalyptasýyn baqylaýǵa múmkindik beredi. Kartada damýdyń barlyq mańyzdy aspektileri kórsetilgen: tıptik oqý baǵdarlamasyn ıgerý barysynda qalyptasatyn fızıkalyq jaǵdaı, kommýnıkatıvti, tanymdyq, ıntellektýaldy, shyǵarmashylyq, zertteý jáne áleýmettik-emosıonaldy daǵdylar. Mundaı júıeli tásil sapaly bilimdi qamtamasyz etedi jáne balalardyń bastaýysh mektepte tabysty beıimdelýine yqpal etedi.
«Beske deıin úlgerý» mobıldi qosymshasymen ata-analardyń erte jastaǵy balalardy damytý, sondaı-aq praktıkalyq bilimin arttyrý boıynsha 300 myńnan asa ata-anany qamtý josparlanyp otyr. «Beske deıin úlgerý» mobıldi qosymshasy tolyǵymen tegin ári messendjerler, ata-analarǵa arnalǵan keńes berý pýnktteri, basqa da qoljetimdi tásilder arqyly taratylady. Nátıjesinde, ata-analar mektep jasyna deıingi balalardy tárbıeleý, damytý, olarmen ózara árekettesý máseleleri boıynsha ádistemelik jáne psıhologııalyq súıemeldeý alady. Bıyl jazǵy kezeńde 115 myń mektepke deıingi jastaǵy balalar 5,1 myń pedagogtiń qatysýymen 2900 mektep bazasynda «Balaqaılar mektebi» qysqamerzimdi kýrsymen qamtyldy. Sınhrondaý jáne mektepke deıingi uıymdar men mektep arasyndaǵy sabaqtastyqty qamtamasyz etý sheńberinde balanyń jeke damý kartasy sıfrlandyryldy, budan ári 1-synyp muǵalimderine beriledi. Bul bizdiń tárbıeshilerge ár balanyń damýynyń odan ári jeke traektorııasyn durys qurýǵa kómektesedi», dedi M.Adamova.
Spıkerdiń sózine súıensek, mektepke deıingi tárbıe jáne oqytý mamandyǵy boıynsha kadrlar daıarlaý 119 kolledjde (onyń ishinde 37-si – memlekettik), mektepke deıingi tárbıe men oqytý pedagogıkasy baǵyty boıynsha 39 JOO-da júzege asyrylady. Bıyl osy baǵyt boıynsha 1268 grant bólindi. Mınıstrlik Ǵylym jáne joǵary bilim mınıstrligimen birlesip «Bolashaq» halyqaralyq stıpendııasynyń basym baǵyttarynyń tizbesine balalardy erte damytý salasynyń mamandyǵyn engizý máselesi pysyqtalyp jatyr.