Mańyzdy áleýmettik nysandar

Qonys toıy

Memlekettik baǵdarlama aıasynda megapolıstegi 304 otbasyna jańa páter kilti tapsyryldy. Shahar basshysy tur­ǵyndardy merekelerimen quttyqtap, tolaǵaı tabys tiledi.

Paıdalanýǵa berilgen úıler qa­lanyń Bozaryq shaǵyn aýdanynda or­nalasqan. Úı kezeginde turǵan azamattar baspanany «Otbasy bank» AQ ar­qyly memlekettik baǵdarlamanyń «2-10-20», «5-10-20» baǵyttary aıasynda nesıe túrinde rásimdep aldy. Jańa úıge qonystanǵandar ishinde múgedektigi bar balalardy tárbıelep otyrǵan, tolyq emes, kópbalaly otbasylar, múmkindigi shekteýli azamattar, jetimder men ata-ana qamqorlyǵynsyz qalǵan balalar, bıýdjettik uıym qyzmetkerleri bar.

Osy baspanalardy alýǵa 304 páterden turatyn 8 kópqabatty turǵyn úıge konkýrs júrgizildi. Qazir úıli bolǵan azamattarmen satyp alý-satý kelisim­sharty jasalyp jatyr. Budan bólek, mem­lekettik baǵdarlama aıasynda «Ot­basy bank» AQ arqyly 400 páterlik 10 kópqabatty turǵyn úıge konkýrs júr­gizilý ústinde.

Prezıdent tapsyrmasymen júzege asyrylyp jatqan memlekettik baǵd­ar­lamalar turǵyndardyń jaıly ómir sú­rýine kómegin tıgizedi. Kredıttik turǵyn úılerdiń qol­jetimdiligin art­tyrý, tabysy az azamattardy yntalandyrý maqsatynda jergilikti bıýdjet ese­binen 311 otbasyna turǵyn úı sertıfıkaty berildi. Bul mańyzdy qujat qaıtarymsyz negizdegi áleýmettik kómek esebinde júredi. Osy sertıfıkatty alǵan azamattar keıin nesıelik baspanaǵa qol jetkize alady. Bıyl megapolıste jyl sońyna deıin taǵy da 4 myńnan astam páter tapsyrylady.

Jańǵyrtý baǵdarlamasynyń tıimdiligi

Memleket basshysy Qasym-Jomart Toqaev el azamattaryn sapaly baspanamen qamtamasyz etý, turǵyn úı-kommýnaldyq sharýashylyǵyn keshendi jańǵyrtý jóninde naqtyly maqsat-mindetter belgiledi. 2029 jylǵa qaraı el kóleminde apatty jaǵdaıdaǵy 1500 tur­ǵyn úı ıesin jańa páterlerge qo­nystandyrý jóninde tapsyrma berdi.

Osyǵan baılanysty Shymkentte turǵyn úılerdi jańǵyrtý baǵdarlamasy qarqyndy túrde júzege asyryla bas­tady. Qazir megapolıste 2 myńnan astam kópqabatty turǵyn úı bar, onyń 70 paıyzdan astamy jarty ǵasyr buryn salynǵan, kópshiligi apatty jaǵ­daıda. 134 turǵyn úı ábden eskirgen. Degenmen úı­lerdi súrip tastamas buryn turǵyn­dar­dan tolyq kelisim alý qajet eken.

Mine, osy baǵdarlama sheńberinde qala ákimi «Shymkent City» shaǵyn aýda­nyndaǵy turǵyndarǵa páter kiltin tabystady. Aınalma ótkelindegi turǵyn úılerdiń biri súrilýge jatatyn nysandar tizimine engen. Ǵımarat 60 jyldan astam ýaqyt buryn salynǵan. Qaýipsizdik pen energııa­ny tıimdi jumsaý talaptaryna múl­de sáıkes kelmeıdi. Mundaı úıler tur­ǵyn­darǵa ǵana ǵana emes, aınaladaǵy ın­fra­qurylymǵa da qaýipti. Sondyqtan olardy buzyp, ornyna jańasyn salǵan jón.

Baǵdarlama shartyna sáıkes apatty úılerdiń ıeleri jańa ǵımarattan kólemi men bólmeleri birdeı páter alady. Jańa baspana burynǵymen salystyrǵanda 20 sharshy metrge keń. Sondaı-aq qonystanýshylar eseptegishterge qo­symsha aqy tólemeıdi. Turǵyn úı zamanaýı talapqa saı salynǵan. Qoryta aıt­qanda, memlekettik turǵyn úıdi jańǵyrtý baǵdarlamasy azamattardy sapaly úımen qamtamasyz etýge, qala­nyń sáýlettik kelbetin jaqsartýǵa, ekolo­gııalyq jaǵdaıdy túzeýge, sondaı-aq ınjenerlik ınfraqurylymdy jańǵyrtýǵa múmkindik beredi.

Balalar jańa mektepke barady

Qala ákimi shahardaǵy alǵashqy eki jaıly mekteptiń ashylýyna qatysty. Nurshýaq shaǵyn aýdanyndaǵy jańa bilim berý ǵımaraty 2000 orynǵa shaqtalǵan, al Qarabastaý turǵyn alabyndaǵy mektep 1200 orynǵa eseptelgen. Bul mektepterde oqýshylar oqý jylynyń II toqsanynan bastap oqıdy.

Mektep tapshylyǵy jyldar boıy shaharda ózekti másele bolyp keldi. Osy problemany sheshýge «Jaıly mektep» ulttyq jobasy septigin tıgizip otyr. Qazir elimizde apatty, úsh aýysymdy mektepter máselesi birtindep sheshimin taýyp keledi.

«Jaıly mektepte» bastaýysh pen joǵary synyp oqýshylarynyń sapaly bilim alyp, jan-jaqty damýyna barlyq jaǵdaı qarastyrylǵan. Bilim uıalary zamanaýı pándik kabınettermen, STEM-zerthanalarmen, robottehnıka synyptarymen jabdyqtalǵan. Múgedektigi bar balalarǵa kedergisiz orta qalyptastyrylǵan. Qaýipsizdik sharalaryna da erekshe nazar aýdarylyp, sandyq beınekameralar men týrnıketter ornatylǵan. Horeografııalyqpen qos­qanda tórt sport zaly, demalys aı­maq­tary men vorkaýt, netvorkıng alań­dary bar. Ulttyq joba aıasynda Shym­kentte buǵan qosymsha taǵy 18 «Jaıly mektep» ashylady dep jos­parlanǵan.

Kók týdyń jelbiregeni...

Megapolıste eń bıik týtuǵyry qa­­lanyp, memlekettik tý kóterildi. Týtuǵyrdyń bıiktigi – 100 metr. Atalǵan ny­sannyń saltanatty ashylý rásimine qala ákimi, máslıhat depýtattary, quqyq qorǵaý organdarynyń basshylary, ataqty sportshylar men jas­tar qatysty. Turǵyndardy aıtýly is-sharamen quttyqtaǵan shahar basshysy «Tulip Hall» konserttik saraıynyń mańyndaǵy bul bıik týtuǵyr qalanyń maq­tanyshy ǵana emes, mádenı-sáýlettik nysan retinde qonaqtar men týrısterdi ózine tartatyn oryn bolaryna senim bildirdi. Uzyndyǵy 30, eni 15 metrlik kók baıraqty megapolıstiń ár núktesinen kórýge bolady. Saltanatty is-sharaǵa jınalǵan kópshilik qaýym týymyz kókke kóterilgende boılaryn maqtanysh sezimi kernep, patrıottyq rýhty oıatqan keremet áserde qalǵandaryn aıtady.

ShYMKENT