Aıtys arqaýy – egemendik

Alǵash ret ótken dúbirli dodaǵa respýblıkamyzdyń ár óńirinen 22 aqyn qa­tysyp, aıtystyń alǵashqy kúni 11 jup bolyp baq synasty. Ulty­myz­dyń biregeı ónerin qoldaý maq­satynda Oqý-aǵartý mınıstri Ǵanı Beısembaev, Parlament Májili­siniń depýtattary Amanjol Áltaı, Janarbek Áshimjan, L.N.Gý­mılev atyndaǵy EUÝ rektory Erlan Sy­dyqov arnaıy kelip, jas óren­derdiń ónerine sáttilik tiledi.

«Aıtysqa jas aqyndardy bala kezinen baýlý maqsatynda Júrsin Erman basqaratyn Aıtys aqyndary men jyrshy-termeshilerdiń halyq­aralyq odaǵy bıylǵa arnalǵan baǵ­darlamasyn bekitken edi. Sol baǵ­darlamada urpaq sabaqtastyǵyn eskere otyryp, úsh satyly aıtysty ótkizýdi qolǵa alǵanbyz. Áýelgi birinshi saty – «Qola dombyra». Buǵan Serikzat Dúısenǵazy je­tekshilik etedi. Ekinshi saty – Er­kebulan Qaınazarov jetekshilik etetin «Kúmis dombyra» jobasy. Úshin­shi satysy – qazirgi maıtalman aqyndarymyz baq synaıtyn, jylda jeltoqsan aıynda elordanyń tórinde baıraǵyn kóteretin «Altyn dom­byra» aıtysy», dedi saltanatty dodanyń shymyldyǵyn ashqan Parlament Májilisiniń depýtaty Amanjol Áltaı.

Sóz saıysynda aıtysker oqý­shylar jastaryna saı ádemi ázildesip, qoǵamdyq máselelerdi de kóterip, taqyrypty da tapqyr jyrlaı bildi. Osylaısha, qazylar alqasynyń she­shimimen iriktelgen 8 aqyn kelesi kezeńge ótti. Olardyń arasynan sońǵy synǵa 5-synyp oqýshysy, shymkenttik Islam Álı Birjanuly men 11-synyp oqýshysy, mańǵys­taýlyq Beıbit Baı­jigit sýyrylyp shyǵyp, sóz saıy­syn jandandyra tústi.

Aıtystyń qorytyndysynda Shym­­­kent qalasynan kelgen Islam Álı Birjanuly toptan ozyp, tuń­ǵysh «Qola dombyra» ıegeri atandy. Júl­deli birinshi oryndy mań­ǵys­taý­lyq Beıbit Baıjigit, ekinshi oryndy aq­tóbelik Araı Nuradın men asta­nalyq Aıǵanym Maqsuthanova ıel­en­di. Al úzdik úshtikti Almatydan kel­gen Erasyl Seıitjanuly men Raýan Nurshabekov, qostanaılyq Nur­ıslam Rogatov túıindedi. Sýyryp­salma sóz saıysyna qatysqan ózge aqyn­darǵa Qanysha Raıysova, Esenqul Ja­qypbek, Nartaı Bekejanov atyn­daǵy arnaıy júlde men baǵaly syı­lyqtar berildi. Sonymen qatar aqyn­dardyń tálimger-ustazdaryna Oqý-aǵar­tý mınıstriniń Alǵyshaty tabystaldy.

Taǵy bir qýanarlyq jaıt, jas aı­tyskerlerdi marapattaý salta­na­tynda sóz alǵan Oqý-aǵartý mınıstri Ǵanı Beısembaev mektep oqýshylary arasynda ótetin bul aıtystyń aýqymyn aldaǵy jyly keńeıte túsetinin aıtsa, L.N.Gýmılev atyndaǵy EUÝ rektory Erlan Sy­dyqov respýblıkalyq «Qola dombyra» oqýshylar aıtysynyń jyl saıynǵy jeńimpazyna EUÝ bilim grantyn taǵaıyndaıtynyn jetkizdi.