Qazaqstannyń aýyl sharýashylyǵy jáne ónerkásip sektorlaryn nyǵaıtý maqsatynda Deere & Company, Eurasia Group jáne «Báıterek» holdıngi arasynda ózara túsinistik týraly memorandýmǵa qol qoıyldy, dep habarlaıdy Egemen.kz.
Kelisimniń maqsaty – elimizdegi tehnologııalardy damytýǵa, bilim almasýǵa jáne turaqty damýǵa járdemdesý. Memorandým talaptaryna sáıkes, seriktestik jańa tehnologııalardy engizýge, sıfrlyq transformasııa men ónerkásiptik damýǵa basa nazar aýdarady, bul aýyl sharýashylyǵy jáne ónerkásip sektorlarynyń tıimdiligin arttyrmaq.
«Aldyńǵy qatarly tehnologııalardy paıdalanyp, bilim almasýdy qoldaý arqyly biz ekonomıkaǵa da, jergilikti halyqqa da paıda ákeletin turaqty ósýdiń negizin qalyptastyramyz», dep málimdedi John Deere-diń TMD jáne Ortalyq Azııa boıynsha «Aýyl sharýashylyǵy jáne kógaldar» baǵytyndaǵy prezıdenti Chaba Leıko.
Al «Báıterek» holdıngi basqarma tóraǵasynyń orynbasary Jandos Shaıhy: «Qazaqstanǵa tikeleı ınvestısııalar salýǵa degen álemdik salalyq kóshbasshylardyń qyzyǵýshylyǵyn quptaımyz, óıtkeni bul bizdiń el men óńirdiń agroónerkásiptik áleýetin iske asyrý arqyly turaqty ekonomıkalyq ósýdi qamtamasyz etedi», deıdi.
Bul kelisim jańa jumys oryndaryn ashýǵa, ekonomıkalyq táýelsizdikti arttyrýǵa jáne Qazaqstannyń aýyl sharýashylyǵy salasynyń turaqty ósýine yqpal etedi dep kútiledi. Ol Deere & Company, Eurasia Group jáne «Báıterek» holdınginiń Qazaqstannyń básekege qabilettiligin arttyrýǵa jáne ony Ortalyq Azııadaǵy aýyl sharýashylyǵy men ónerkásiptik damýdaǵy kóshbasshy retinde qalyptastyrýǵa baǵyttalǵan ortaq maqsatyn kórsetedi.
Aıta keteıik, Deere & Company – aýyl sharýashylyǵy, qurylys jáne orman sharýashylyǵy jabdyqtaryn óndirý boıynsha álemdik kóshbasshy kompanııanyń biri.