Medısınada adam qoly men aqylynan asqan qural joq desek te, osy saladaǵy izdenister men tehnıkalar úzdiksiz damyp jatqany, onyń ıgiligin otandastarymyzdyń kóre bastaǵany qýantady.
Almatydaǵy №4 qalalyq klınıkalyq aýrýhanada halyqaralyq sheberlik sabaǵy ótip, otandyq travmatologter men ortopedter tolyq avtomattandyrylǵan ortopedııalyq júıede hırýrgııalyq operasııa jasaýǵa jattyqty. Tize býyndarynda aýyr keseli bar tórt birdeı naýqasqa robottyń kómegimen endoprotezdeý jasaldy. Júıe tize býyndaryna artroplastıka jasaýda stereotaktıkalyq qurylǵy retinde qoldanyldy. Robot naýqastyń MRT, KT sýretterin paıdalaný arqyly hırýrgke operasııa aldyndaǵy daıyndyqty josparlaýǵa kómektesip, operasııa barysynda saraptamalyq aqparattar berip otyrady.
Otandyq medısınadaǵy aıtýly sát, robotpen alǵashqylardyń biri bolyp tize býyndaryna operasııa jasaý baqyty №4 qalalyq klınıkalyq aýrýhanasynyń bólimshe meńgerýshisi Manarbek Áýbákirovke buıyrdy. Operasııa kezinde S.Asfendııarov atyndaǵy QazUMÝ travmatologııa jáne ortopedııa kafedrasynyń professorlyq-oqytýshylyq quramy men aýrýhananyń jetekshi dárigerleri keńes berip otyrdy.
«Tize býynynyń 3-4 deńgeıdegi deformasııalyq gonartrozymen 10 jyldan astam aýyratyn naýqasqa operasııa jasadyq. Shyn máninde 3 nemese 4 satydaǵy gonartrozdy emdeýdiń jalǵyz tıimdi joly – hırýrgııalyq operasııa bolǵandyqtan, aldyn ala tize býynynyń kompıýterlik tomografııasy jasalyp, zertteý derekteri júıege júkteldi. Robot bizge tizedegi aýytqýlardy, ımplant ólshemin eseptep berip, operasııa kezinde júıe tapsyrmany ózi oryndaǵandaı áser qaldyrdy. Robot mıllımetrlik dáldikpen operasııalyq aımaqty kesip alǵandyqtan, oǵan mamandar aralasqan joq. Iаǵnı bul joǵary mamandandyrylǵan robottandyrylǵan tehnologııa, sondyqtan, naýqas aıaǵyna tez turady, operasııadan keıingi aýyrsyný belgileri de, jaraqaty az bolady», deıdi M.Áýbákirov.
№4 qalalyq klınıkalyq aýrýhana jedel, josparly hırýrgııalyq, travmatologııalyq, neırohırýrgııalyq, kardıohırýrgııalyq kómektiń tolyq sıkli bar mamandandyrylǵan travmatologııalyq ortalyqqa aınalyp keledi. Aýrýhanada revızııalyq endoprotezdeý jónindegi sheberlik dáristerimen qatar, juqpaly asqyný máseleleri qaralyp, talqylanyp otyrady. Aýrýhana – iri býyndardy aýystyrýda jetekshi ortalyq, oǵan jyl saıyn osy emhanada jasalatyn 2 myńǵa jýyq býyn aýystyrý operasııalary dálel-dáıek. Buǵan deıin munda jartylaı avtomatty júıesi bar robot synaqtan ótken bolatyn.
ALMATY