Astanada alǵash ret «Aýyl mektebi» fotokórmesi ótti. «ÓzgeEpic» kreatıv habynda uıymdastyrylǵan bul is-shara shalǵaı aýylda ornalasqan bir mekteptiń tynys-tirshiligin sıpattap, jańashyl bastamalardy nasıhattaıdy.
Atalǵan kórmege Jambyl oblysy Jýaly aýdany Baýyrjan Momyshuly aýlynyń Álıhan Bókeıhan atyndaǵy №15 tirek mektep-lıseıinde túsirilgen fotosýretter qoıylǵan. Jıynǵa osy bilim oshaǵynyń dırektory Rýslan Saılaýbaev ta qatysty.
«Bizdiń mektepte 603 bala eki aýysymda bilim alyp jatyr. Tirek mektepter jelisine 2023 jyly kirgen edik. Soǵan baılanysty materıaldyq-tehnıkalyq bazamyz tolyqtaı jańaryp, oqýshylarymyz oblystyq jáne respýblıkalyq deńgeıdegi robottehnıka, ǵylymı jobalar saıystarynda júlde ala bastady. Materıaldyq baza jaqsarǵan soń, biz túrli úıirmeler ashtyq. Aıtalyq, telestýdııa, robottehnıkasy, qolóner sheberi, drama óneri, dombyra, shahmat, art stýdııaǵa baılanysty qylqalam sheberi úıirmeleri jumys istep tur. Osyndaı jumystardyń arqasynda aýyldaǵy men qaladaǵy mektepterdegi bilim sapasynyń alshaqtyǵy tómendep keledi. Sol talaptarǵa saı bolǵandyqtan búgingi kórmege bizdiń tirek mektep-lıseı tańdalyp otyr», dedi R.Saılaýbaev.
«Aýyl mektebi» fotokórmesi – shalǵaıdaǵy bilim berý mekemeleriniń zııatkerlik áleýetin kópshilikke tanytýǵa, sondaı-aq aýyldaǵy oqýshylardyń damýyna jańa serpin beretin biregeı shyǵarmashylyq joba. Kreatıv hab dırektory ári joba jetekshisi Toǵjan Qurmanjanqyzynyń aıtýynsha, bul kóshpeli kórme endigi kezekte Túrkistan qalasynda, sosyn Almatyda ótedi.
«Maqsatymyz – qala jáne aýyl jastaryna mádenı-rýhanı qundylyqtardy teń qoljetimdi etý. Osy sebepten de bizge Bilim salasyn turaqty damytý qorynyń aýyl mektepterin jandandyrý jobasy óte qatty unady. Kórmeniń fotograftary – Áıgerim Begimbet pen Sábına Ábdimálik. Olardyń osyǵan deıin de áleýmettik-aǵartýshylyq baǵyttaǵy kórmesin uıymdastyrǵanbyz. Shyǵarmashylyq tobymyzben birge osy jobany úsh aı zerttep, zerdelep, jaryqqa shyǵaryp otyrmyz. Jumys barysynda aýyldaǵy bilim berýdiń jańa dáýiri bastalǵanyn sezindik. Qalanyń ozyq mektepterinen qalyspaıtyn, keı tusta ozatyn mektepter bar ekenine kóz jetkizdik. Sondyqtan da biz bul izgi ózgeristerdiń óner týyndysyna aınalǵanyn, kópshilikke taralǵanyn qaladyq», dedi Toǵjan Qurmanjanqyzy.
Kórme barysynda fotosýretshiler shyǵarmashylyq oılaryn ortaǵa salyp, jobanyń birneshe keıipkerin tanystyrdy.
«Shynymdy aıtsam, men ózim de aýylda eski mektepte bilim aldym. Bizdiń aýylda birde-bir úıirme bolǵan joq. Sabaqtan keıin tek úı sharýasymen ǵana aınalystyq. Bizdi damytatyn, ósiretin, shyǵarmashylyǵymyzdy baıytatyn esh nárse bolmady. Bul jobaǵa shaqyrǵan kezde, árıne, qýandym. О́ıtkeni men bir jyldary Shymkenttegi Nazarbaev zııatkerlik mektebinde jumys istedim. Ol jaqtaǵy múmkindikterdi, balalarǵa jasalǵan jaǵdaıdy, úıirmelerdi, bilim sapasyn kózimmen kórdim. Sodan soń mundaı ıgilikter nege bir ǵana mektepte bolýy kerek degen oıǵa qaldym. Osy kórmege arqaý bolǵan Jýaly aýdanyndaǵy bilim oshaǵyna barǵanda sol NZM-nyń aýyldaǵy úlgisin kórgendeı boldym. Qarańyz, mektepte telestýdııa bar. Oqýshylar ózderi aýyldyń jańalyqtaryn jazady. Kameraǵa ózderi túsiredi, ózderi montajdaıdy, sosyn ózderi mektepterinde ekrannan kórsetedi. Iаǵnı osylaı aýyl mektepterinde de jaǵdaı jasaýǵa bolatynyn pash etkim keldi», dedi Áıgerim Begimbet.
Aıta keteıik, osynaý ıgilikti fotokórme «ÓzgeEpic» kreatıv habynyń bastamasymen jáne Bilim salasyn turaqty damytý qorynyń qoldaýymen júzege asty.