Analar keńesiniń mereıli belesi

Forýmnyń alǵashqy kúni res­pýblıkalyq Analar keńesi músheleriniń biliktiligin arttyrý maqsatynda semınar uıym­dastyrylǵan. Oǵan Qazaq­stan halqy Assambleıasy respýb­lıkalyq Analar keńesiniń tór­aǵasy Názıpa Shanaı, «Ana úıi» negizin qalaýshy Anar Ra­hımbaeva, Atyraý oblysy áke­ler keńesiniń tóraǵasy Shota Qanatov, sondaı-aq memlekettik organdardyń ókilderi jáne óńirlik Analar keńesteriniń músheleri qatysty.

Biliktilikti artyrý semınary barysynda «Birtutas tárbıe» tujyrymdamasyn iske asyrýda qoǵamǵa tusaý bolar ótkir máseleler talqylandy. Al ekinshi kúni elordadaǵy Dostyq úıinde saltanatty is-shara ótti.

Jıynǵa Qazaqstan halqy Assambleıasy tóraǵasynyń oryn­basary Marat Ázilhanov, Máde­nıet jáne aqparat vıse-mınıstri Aızada Qurmanova, Oqý-aǵartý mı­nıstr­­ligi tárbıe ju­mysy jáne qo­symsha bilim departamentiniń dırektory Me­rýert Medet­be­­ko­va, Ulttyq ulan bas qolbasshy­sy­nyń tárbıe jáne áleýmettik-quqyqtyq jumystar jónindegi oryn­basary general-maıor Qa­nat Úmbetov, atalǵan keńes múshe­­leri jáne etnomádenı birlestikter­­diń ókilderi qatysty.

– Analardyń patrıotızmdi, ulttyq rýhty qalyptastyrýdaǵy jáne otbasylyq qundylyqtardy saqtaýdaǵy mańyzy zor. Analar keńesi 10 jyl ishinde kópte­gen bastamany júzege asyryp, etnos­aralyq kelisimdi damytýǵa jáne otbasylyq dástúrlerdi nyǵaıtýǵa eleýli úles qosty. Respýblıka boıynsha 1 700-den asa Analar keńesi genderlik teńdikti saqtaý, áıelderdiń quqyqtaryn qorǵaý, otbasy ınstıtýtyn damytý, ári nashaqorlyq pen zorlyq-zombylyq sııaqty áleýmettik máselelermen kúresý sııaqty memlekettik basymdyqtar sheń­berinde óz qyzmetin belsendi júr­gizip jatyr, – dedi A.Qur­manova.

Qatysýshylar «Salamatty sana» arnaıy jobasynyń jú­zege asyrylý barysy men óńir­lik Analar keńesteriniń qyz­meti talqylady. Is-sharada Qýan­dyq Bıshimbaevtyń isinde memlekettik aıyptaýshy bolǵan Aıjan Aımaǵanova sóz aldy. Ol jınalǵandardy mereıtoı­men quttyqtap, halyqty qoǵam­da quqyqtyq mádenıetti nasıhat­taýǵa belsendi atsalysýǵa sha­qyrdy.

– Keıingi kezde jastar arasynda quqyq buzýshylyqtyń kóbeıýi baıqalady. Zorlyq-zombylyq, vandalızm, buzaqy­lyq faktileri men balalarǵa qatysty qylmystardyń artýy alańdatyp tur. Balalar qu­qyq pen bostandyq saqtalatyn qaýip­siz qoǵamda ósýi qajet. Qoǵam zańnyń ústemdigi arqyly ǵana damıdy. Memleket basshysy Qasym-Jomart Toqaev ta dál osy sózderdi halyq aldyndaǵy baıandamalarynda aıtyp júr. Analar keńesi «Tártipti ózińnen basta» qoǵamdyq aksııasyn bastaýdy usyndy. Mundaǵy basty maqsat – jastar arasynda quqyqtyq mádenıetti qalyptastyrýǵa ún­deý, quqyq buzýshylyq pen tár­tipsizdiktiń aldyn alý, qoǵam­da zań men tártip ústemdigin nasıhattaý. Osy arqyly jastardy quqyq buzýshylyqtan aýlaq bolýǵa tárbıeleımiz, – dedi prokýror.

Basqosýda Analar keńesiniń belsendi músheleri azamattyq qoǵamdy damytýǵa jáne etnos­aralyq birlikti nyǵaıtýǵa qosqan úlesi úshin marapattaldy.