Almatyda alǵash ret 9-synyptan bastap balalardy qutqarýshy mamandyǵyna úıretetin «Jas qutqarýshy» synyby ashyldy. Jetisý aýdanyndaǵy №87 jalpy bilim beretin mektepte ashylǵan jańa synyp dárisi Qutqarýshylar kúninen bastaý aldy.
Synypta oqýshylar órt, jer silkinisi, sýǵa túsý maýsymyndaǵy oryn alatyn oqys oqıǵalar barysynda qalaı áreket etýdi úırenedi. Eń bastysy, jetkinshekter jastaıynan jeke ómirine, qoǵamdyq qaýipsizdik máselesine jaýapkershilikpen qaraýǵa, tótenshe jaǵdaıda paıdasy tıetin tájirıbelik daǵdylarǵa mashyqtanady.
«Bul – bolashaq Otan qorǵaýshylardy tárbıeleýde jańa kezeńniń bastalǵanyn bildiretin mańyzdy qadam. Oqýshylar jas qutqarýshylar antyn qabyldap, ózderine elin, qorǵaý, tótenshe jaǵdaıda qaýipsizdik sharasyn saqtaý jaýapkershiligin júktedi. Balalarǵa sáttilik tileımiz. Olardyń qoǵam damýyna úles qosatyn tulǵa bolyp qalyptasatynyna senemiz», dedi Jetisý aýdanynyń ákimi Lázzat Jylqybaeva.
Synyptyń saltanatty ashylý rásiminde kelýshilerge jol talǵamaıtyn motokólik, qarda júretin kólik, kvadrosıkl, jedel áreket etetin órt sóndirý mashınasy syndy qutqarýshylardyń tehnıkasy men jabdyqtarynyń kórmesi uıymdastyryldy.
«Jas qutqarýshy» synyby óskeleń urpaqtyń óz basyna ǵana emes, qoǵamdyq qaýipsizdik máselesine sanaly da jaýapkershilikpen qaraýdy qalyptastyrýdy, turaqty tájirıbelik daǵdylardy meńgerýdi, tótenshe oqıǵalar kezinde jyldam áreket etý qabiletin damytýdy kózdeıdi. Bolashaqta jas qutqarýshylar azamattyq qorǵaý organdary qyzmetkerleriniń qataryn tolyqtyrady dep úmittenemiz», dedi Almaty qalasy tótenshe jaǵdaılar departamentiniń basshysy Nurlan Atyǵaev.
ALMATY