Toı dese qý bas domalaıdy emes pe, yryń-jyryńmen tún asyryp baryp bitirip, biraz erkek kindik bir bólmede jatýǵa týra kepti. Bár-báriniń túk bolmaǵandaı dóńkıip jatystaryn.
Pyqyp jaılap jambastap otyryp, qos gazetti qyrnap búktep, shybyn urǵysh jasady. «Qarap otyrǵansha qalǵı otyraıyn» demekshi, shybyn qorýdy jón dep tapty.
Oń jambasyn ala Oqalaq omala jyǵylǵan eken... jatysyn, mop-momaqan, bul dúnıedegi qýlyq-sumdyqtan beıhabar baladan ármen. Qýlyǵyna quryq boılamas ıt... Áp bárekeldi, mańdaıyna bir shybyn jáımen qona qalmasy bar ma? Pyqyp qolyndaǵysymen qoıyp qaldy... Ebedeısiz qımyldaǵandiki me, qapy qaldy. Esesine qasqa mańdaıǵa qatyr qaǵaz «qaharlana» tıdi. Bylq eter emes. Bylq turmaq, buny mazaq qylǵandaı ezý tartyp yrjıǵandaı boldy... Aramnyń aramzasy, jaqsylyǵy bir basynan aspas pasyq neme. Byltyrǵysyn umyta qoımas...
Qudaı ońdap qulaq túbine qońyr shybyn qona qalmasy bar ma? Perip kep qaldy... Qalt ketpepti, kózin ashqansha dep shybyn óligin nysana etip taǵy bir siltedi. Úrke qaraǵan oǵan qońyr shybyndy kórsetip qutyldy... Aramdyǵy ózine, istegenin aldyna keltirmese de, eki uryp ázirge aıyzy qandy.
...Sol jambasyn ala Sándibaı bajasynyń bes jasar Bekire balasy sozylyp jatypty. Biraq shybyn qurǵyrǵa bala ne, basqa ne, báribir-aý. Jelpip qoryǵan boldy, kórpesin qymtap japqan boldy.
...Ákesin aıamaǵan maqul. Birde túıe, birde bıe. Kerek bolsań — kelinnen ári, qajet bolmasań — qaıyn atamnan ári. Talaı esem ketti, talaıymdy talapaı etti... Bárekeldi, qona qapty... ústi-ústine pergilep ótti... Kózin ashyp keýdesin kótergenshe urǵylady... Ábúıir bop osynyń aldynda óltirgen qońyr shybyn ornynda eken, ilip alyp kórsete qoıdy... Senbegendeı súzile qarap biraz otyrdy da, lám demesten etpetteı qulap búrkenip aldy.
...E, mynaý Myrtyq... kóksoqqan, ur da jyqtyń dál ózi. Kúni keshe emes pe edi, áı-sháısiz ádireńdep, kóp el aldynda abyroıyn aıran etkeni... Perip kep qaldy... Qaǵyp qoıyp qorylyn jalǵastyrdy. Qulaqtan ústi-ústine úsh ret ushyqtaǵanda ǵana baryp qımylǵa kelip, bet-aýzyn sıpap alyp aýnap túsip ánine basty... E, meıli, odan ármen, biraz tópeshtep Pyqyptyń da aıyzy qandy...
...Áp, páleket, yńǵaıy keldi degen osy, buny ıtshe tepkilese de aıyby joq... Qulashtap urǵandiki me, gazet bolsa da tumsyqtan qara qandy saý degizgeni... Pyqyp qolyndaǵysyn laqtyryp, kórpe astyna kirip jym boldy.
Anaýym atyp turyp, aýyzǵy úıge atyryldy...
...Pyqyp shybyn shyqpyrtýyn qoıyp maýjyrap-balbyrap qalǵyp ketken eken, bet-aýyz demeı pergilegen soqqydan úrkip-shoshyp atyrylyp turyp edi, aldynda baǵanaǵy — ózi jelpip qorǵaǵan bes jasar Bekire bala — bir qolynda qyrnap búktelgen qos gazet, ekinshi alaqanynda tyraıyp qalǵan qońyr shybyn – yrjyń-yrjyń etedi...
Berik SADYR