Ulty úshin boıyndaǵy baryn berip, jan aıamaı eńbek etken uly tulǵalarymyzdyń báriniń kúresker joly mekteppen baılanysty. Olardyń sanasynda mektep pen bilimdi túzeý – ultty oıatýmen birdeı degen tolǵaǵy pisken pálsapa boldy. Keshegi ker zamanda týyp, halqymyzdyń bilim alý, ǵylym jolyna túsý syndy kúreske toly ómirine tym erte aralasqan Alash ardaqtysy, aqyn Mirjaqyp Dýlatulynyń týǵan kúni qarsańynda elordadaǵy Abaı Qunanbaıuly atyndaǵy №87 mektep-gımnazııada «Alash – ultty oıatqan rýhty sóz» atty mazmundy is-shara ótti.
Ony Á.Bókeıhan Alash ǵylymı-zertteý ınstıtýty, «Qyr balasy» QQ jáne joǵary da atalǵan bilim ordasymen birlesip ótkizdi. Is-shara aıasynda «Qyr balasy» qoǵamdyq qory basyp shyǵarǵan kitaptardyń tusaýy kesilip, kópshilikke tanystyryldy. Aıtalyq, bıyl «Alash kitaphanasy» serııasymen Nuǵyman Manaı, Ǵazymbek Birimjannyń shyǵarmalar jınaǵy jáne «Jetisýdaǵy Alash tarıhy: Jarkent izderi», «Qanysh Sátbaev fenomeni» zertteý eńbekteri oqyrmanǵa jol tartty. Sondaı-aq «Ultty oıatqan uly sóz» serııasymen Álıhan Bókeıhan, Ahmet Baıtursynuly, Mirjaqyp Dýlatuly, Halel Dosmuhameduly, Mustafa Shoqaı syndy Alash zııalylarynyń naqyl sózderi toptastyrylyp, jeke kitapsha retinde jaryq kórgen.
Mádenı is-shara basynda sóz alǵan Abaı Qunanbaıuly atyndaǵy №87 mektep-gımnazııasynyń dırektory Aıgúl Ońdaǵanqyzy: «Biz osyndaı is-sharalar arqyly mektebimizdegi jas urpaqtardyń sanasyna ulttyq tárbıe uǵymyn sińirip, olardyń eliniń, jeriniń, ultynyń tarıhy men mádenıetin, salty men dástúrin jaqsy biletin bilim ıeleri etip tárbıeleýge qulshynyp jatyrmyz. Bir sózben aıtqanda, bizdiń maqsatymyz – tulǵa tárbıeleý, qalyptastyrý», dedi ol.
Ádebı jıynǵa Qaısar Álim, Aıgúl Serikqyzy, Erbol Erdembekuly, Marat Ábsemet, Sholpan Tilepına, Saǵymbaı Jumaǵul, Almas Jumaǵalı, Qaıyrbek Kemeńger, Alma Saılaýqyzy, t.b. syndy alashtanýshy – ǵalymdar men Roza Baqtyǵalıqyzy, Rızabek Kemeńger, Kamlet Baıahmetuly sekildi Alash ardaqtylarynyń urpaqtary sóz alyp, Alash arystary týraly parasatty oı tolǵady. Sonymen qatar Abaı mektebiniń oqýshylary Mirjaqyp Dýlatuly týraly «Azamaty Alashtyń» atty qoıylym qoıdy. 11 «Á» synyp oqýshysy Saıajan Azamatqyzy M.Dýlatulynyń «Qazaq tiliniń muńy» maqalasyn, bastaýysh synyp oqýshylary Alash arystary týraly óleńderdi jatqa oqydy. Ásirese jas sýretshi Nazerke Bolatqyzynyń Alash arystarynyń ár kezdegi beınesin qylqalammen sóıletken týyndylary keshke qatysqan barsha qaýymnyń qyzyǵýshylyǵyn týǵyzdy. Muny mektep oqýshylaryna ulttyq tálim-tárbıe berýdiń jańasha joly dep túsinýge bolady.
Mazmundy is-sharadaǵy taǵy bir erekshelik – Astanadaǵy Alash qaıratkerleriniń esimi berilgen mektep dırektorlary men muǵalimderi de osy basqosýǵa qatysyp, óz oılarymen bólisti. «Qyr balasy» qoǵamdyq qorynyń prezıdenti Janbolat Abaıhan men quryltaıshysy Ertaı Bilál jańa kraýdfandıngke úles qosqan azamattarǵa kitaptar tabystady.
«Alash» ǵylymı-zertteý ınstıtýtynyń dırektory Ushqyn Sáıdirahman «Alash murasyn oqytý – ulttyq tárbıe ózegi» taqyrybynda baıandama jasap, «mektepte tildik orta qalyptastyrý, is-sharalardyń qazaq tilinde ótýin negiz etý, ulttyq qundylyqtardy dáripteıtin arnaıy jobalar daıyndaý, ulttyq mádenıetti tájirıbege engizý, Alash arystarynyń atyn ıelengen mektepterdiń odaǵyn qurý jáne sol mektepterdiń oqýshylary arasynda «Alash olımpııadasyn» ótkizý» atty usynysyn ortaǵa saldy.
Jıyn sońynda Erbol Erdembekuly men Roza Baqtyǵalıqyzyna «Alash zııalysy» medali, Sholpan Tilepına, Kamlet Baıahmetuly jáne Murat Eskendirulyna «Barlybek Syrttanuly» medali tabystaldy. Belsendi demeýshi azamattardyń atynan úzdik 20 oqýshyǵa «Alash stıpendııasy» berildi.