Elimizdegi jergilikti saılanbaly ókildi organ – máslıhattardyń qurylǵanyna bıyl 30 jyl toldy. Osyǵan baılanysty Shymkenttegi «Kórme» ortalyǵynda arnaıy merekelik is-shara ótti. Senat, Májilis, máslıhat depýtattary, ardagerler, qoǵam qaıratkerleri qatysqan bul is-sharada qala ákimi Ǵabıt Syzdyqbekov quttyqtaý sóz sóılep, birqatar azamatty marapattady.
Shahar basshysy: «Máslıhattyń qoǵamdaǵy róli qashan da bıik. Bul – jergilikti ókildi organ retinde halyq pen bılik arasyndaǵy altyn kópir. Qalalyq máslıhattyń ár shaqyrylymdaǵy depýtattary shahardyń áleýmettik-ekonomıkalyq damýyna qomaqty úles qosyp keledi. Búgingi tańda Memleket basshysy Qasym-Jomart Toqaevtyń bastamasymen elimizde aýqymdy saıası reformalar júzege asyp jatyr. Prezıdent máslıhattar men jergilikti atqarýshy organdarǵa halyqpen tyǵyz baılanysta jumys istep, turǵyndardyń muń-muqtajyn birigip sheshý jóninde mindet qoıdy. Osy oraıda qalalyq máslıhat ákimdikpen birge barlyq máseleni sheship, nátıjeli eńbek etip keledi. Jınalǵan barsha kópshilik qaýymdy elimiz boıynsha máslıhattyń qurylǵanyna 30 jyl tolýymen quttyqtaımyn», deı kele birqatar eńbek ardageriniń keýdesine mereıtoılyq tósbelgiler taqty.
Sondaı-aq merekelik jıynda Parlament Senatynyń depýtaty Aıgúl Qapbarova Senat tóraǵasy Máýlen Áshimbaevtyń quttyqtaý hatyn oqyp berip, birqatar azamatty mereıtoılyq tósbelgilermen marapattady.
Shymkent qalasy máslıhatynyń tóraǵasy Bahadyr Narymbetov is-sharada máslıhat tarıhyna toqtalyp ótti. Ol ókildi organnyń qalyptasý kezeńderinen syr shertip, árbir shaqyrylymynda kórnekti ókilder saılanǵanyn, olar óndiris, densaýlyq saqtaý, bilim berý, bıznes, mádenıet salalary boıynsha megapolıstiń áleýmettik-ekonomıkalyq damýynda zor úles qosqanyn atap ótti.
«Memleket basshysy barlyq deńgeıdegi máslıhat depýtattarynyń alǵashqy respýblıkalyq forýmynda sóılegen sózinde «Bıliktiń qos qanaty ákimdikter men máslıhattyń negizgi qyzmeti – halyqtyń ál-aýqatyn jaqsartý. Sol úshin birlese otyryp, aıanbaı eńbek etip, el senimin aqtaý negizgi mindet» degen edi. Osy oraıda Shymkent qalalyq máslıhaty barlyq másele boıynsha qala ákimdigimen birlese sheshim qabyldap, eńbektiń nátıjesin kórsetip keledi. Máselen, osy jyldyń on aıynda megapolıstiń ekonomıkalyq ósimi 12%-dy qurap, bul kórsetkishpen Shymkent respýblıkada kósh bastady. Qazirgi tańda 2,7 trln teńgeniń 220 ınvestısııalyq jobasy daıyn, soǵan sáıkes keleshekte 30 myńnan asa jańa jumys oryndary qurylady. Al jyl basynan beri megapolıske tartylǵan ınvestısııa 536 mlrd teńgege jetti. Qalalyq máslıhatta kásipker depýtattar da az emes. Olar ınvestısııa tartý, halyqty kásipkerlikke baýlý isine belsene atsalysyp júr. Saılaýshylardyń senimin arqalaý – asa jaýapty mindet. Sol jolda eńbek etken ardagerlerdi, búgingi depýtattardy mereıtoılarymen quttyqtaımyn. Olar el múddesi úshin áli talaı qyzmet atqararyna senimim mol», dedi B.Narymbetov.
ShYMKENT