Senat Spıkeri Máýlen Áshimbaevtyń tóraǵalyǵymen Ornyqty damý salasyndaǵy ulttyq maqsat-mindetterdiń iske asyrylýyna monıtorıng júrgizý jónindegi Parlamenttik komıssııanyń keńeıtilgen otyrysy ótti. Buǵan Ortalyq Azııa elderi parlamentteriniń ókilderi qatysty.
Is-shara barysynda parlamentter men jergilikti ókildi organdardyń Ortalyq Azııa elderiniń ornyqty damýyn qamtamasyz etý jolyndaǵy róli talqylandy. Sondaı-aq qatysýshylar atalǵan baǵyttaǵy tájirıbelerimen bólisti.
M.Áshimbaev óz sózinde otyrystyń keńeıtilgen formaty óńir elderi parlamentteriniń strategııalyq dıalogin nyǵaıtýdy kózdeıtinin atap ótti. Sondaı-aq ol mundaı qadam ózara yntymaqtastyqty arttyryp, Ornyqty damýdyń jahandyq maqsattaryna qol jetkizý úshin birlesip áreket etýge yqpal etetinin aıtty.
«Qazaqstan Prezıdenti Qasym-Jomart Toqaev «Ortalyq Azııa renessansy: ornyqty damý jáne órkendeý joly» atty tujyrymdamalyq maqalasynda óńirdiń ornyqty damýdyń jahandyq kún tártibindegi róline keńinen toqtaldy. Ornyqty damýdyń kún tártibi qazirgi tańdaǵy ortaq jahandyq jáne aımaqtyq problemalardy sheshýge baǵyttalǵan. Bul rette klımattyń ózgerýi, qurǵaqshylyq, sý resýrstarynyń tapshylyǵy jáne ekologııa máseleleri óńir úshin ózekti ekeni belgili. Sondaı-aq halyqtyń ómir súrý deńgeıin odan ári arttyrý da elderimiz úshin ortaq mindet», dep palata spıkeri memleket basshylary belgilegen óńir elderiniń ornyqty damýyn qamtamasyz etetin biryńǵaı basymdyqtar qatarynda da aımaqty órkendetý jolyndaǵy ortaq maqsattar bar ekenin atap ótti.
Sonymen qatar Senat tóraǵasy jahandyq jylyný, Kaspıı teńiziniń tartylýy, Araldyń joıylýy sııaqty ózekti klımattyq syn-qaterlerge nazar aýdardy. Bul problemalardy ońtaıly sheshý úshin Ortalyq Azııa elderiniń naqty úılesimdi jumysy qajet. Onsyz eńserý múmkin emes. Bul rette parlamentaralyq ózara is-qımyl, zańnamalyq tájirıbe almasý jáne jergilikti ózin-ózi basqarý organdarymen yntymaqtastyq ornatý mańyzdy ról atqarady.
«Búginde ulttyq parlamentterdiń ornyqty damý maqsattaryna qol jetkizýge qosyp otyrǵan úlesi aıtarlyqtaı artyp keledi. Onyń ishinde ekojúıelerdi saqtaý, sý jáne energetıkalyq qaýipsizdikti qamtamasyz etý baǵytyndaǵy jumysty erekshe atap ótken jón. Biz óńirdiń úılesimdi, ınklıýzıvti jáne teńgerimdi damýy úshin parlamentaralyq deńgeıdegi birlesken jumysymyzdy odan ári jandandyrýymyz kerek. Sondaı-aq jergilikti ózin-ózi basqarý organdarynyń jumysy da asa mańyzdy. Ornyqty damý kún tártibin jergilikti jerlerde jáne árbir eldi mekende ilgeriletý baǵytyndaǵy jetistikter kóbine solardyń jumysyna baılanysty. Sondyqtan jergilikti ókildi organdardy osyndaı dıalogke belsendi jumyldyrý jáne halyqty alańdatqan osy deńgeıdegi máselelerdi sheshý úshin Ornyqty damý maqsattary arqyly biryńǵaı tásilder ázirleý aıryqsha mánge ıe», dedi M.Áshimbaev.
Otyrys kezinde parlamenttik komıssııa músheleri men sarapshylar Qazaqstannyń ODM-ǵa qol jetkizý jolyndaǵy bastamalaryna nazar aýdaryp, 10 jyl ishindegi aralyq nátıjelerdi taldady. Sondaı-aq olar óńir elderiniń ornyqty damýyn baıaýlatyp otyrǵan osal tustardy talqylady.
Is-sharanyń nátıjesinde memlekettik organdardyń jáne Ortalyq Azııa elderi parlamentteriniń ókilderi men sarapshylar komıssııa qyzmetin odan ári jetildirý jónindegi oılarymen bólisti. Odan bólek, qatysýshylar ODM-dy ıntegrasııalaýǵa jáne ulttyq zańnamaǵa ozyq tájirıbelerdi engizýge qatysty pikir bildirip, usynystaryn aıtty.
Parlamenttik komıssııa otyrysynda komıssııa múshelerimen birge Qazaqstan Premer-mınıstriniń orynbasary – Ulttyq ekonomıka mınıstri Nurlan Baıbazarov, Qyrǵyz Respýblıkasy Jogorký Keneshi Halyqaralyq ister, qorǵanys, qaýipsizdik jáne kóshi-qon komıtetiniń tóraǵasy Shyńǵys Aıdarbekov, Tájikstan Respýblıkasy Madjlısı Olı Madjlısı mıllı Konstıtýsııalyq negizderdi, adamnyń, azamattyń quqyqtary men bostandyqtaryn jáne zańdylyqty qamtamasyz etý jónindegi komıtetiniń tóraǵasy Dılshod Rahmon, О́zbekstan Respýblıkasy Olıı Májilisi Senaty Qorǵanys jáne qaýipsizdik máseleleri jónindegi komıtetiniń tóraǵasy Kýtbıdın Býrhanov, BUUDB-nyń Qazaqstandaǵy Turaqty ókili Katarjına Vavernıa, BUUDB-nyń Túrikmenstandaǵy quqyqtyq konsýltanty Shırın Ahmedova, Nazarbaev ýnıversıteti Memlekettik saıasat joǵary mektebiniń qaýymdastyrylǵan professory, Senat janyndaǵy sarapshylar klýbynyń múshesi Serik Orazǵalıev, halyqaralyq uıymdar men ǵylymı-saraptamalyq qoǵamdastyqtyń ókilderi jáne basqa da sarapshylar sóz sóıledi.