Elordada «AMANAT» partııasynyń qoldaýymen Ulttyq sport qaýymdastyǵy uıymdastyrǵan «Altyn tuǵyr – 2024» ulttyq sport túrleri boıynsha jyldyń úzdik sportshylaryn marapattaý rásimi ótti. Is-sharaǵa Májilis Spıkeri, «AMANAT» partııasynyń Tóraǵasy Erlan Qoshanov, Prezıdent keńesshisi – Prezıdenttiń Baspasóz hatshysy Berik Ýálı, Týrızm jáne sport mınıstri Erbol Myrzabosynov jáne taǵy basqalar qatysty, dep habarlaıdy Egemen.kz «AMANAT» partııasynyń baspasóz qyzmetine silteme jasap.
Is-sharany ashqan Erlan Qoshanov osy jyl qazaqtyń ulttyq sport túrleri úshin aıtýly jyl bolǵanyn atap ótti. Búkil álem V Dúnıejúzilik kóshpeliler oıyndarynda otandyq sportshylarymyzdyń jeńisine kýá boldy. Prezıdent bastamasymen olardyń basym kóbi memlekettik nagradalarǵa usynyldy.
«Memleket basshysy Qasym-Jomart Toqaev Ulttyq sport túrlerin damytýǵa erekshe kóńil bóledi. Olar bizdiń mádenıetimiz ben mentalıtetimizdiń ajyramas bóligi. Prezıdent tapsyrmasy boıynsha elimizde ulttyq sport ortalyqtary, klýbtar, mektepter ashylyp jatyr. Onda 600 myńnan astam adam qazaqtyń dástúrli sport túrlerimen aınalysady. Búgingi «Altyn tuǵyr» syılyǵy ulttyq qazynamyzdy saqtaýǵa jáne ony elimizde, dúnıe júzinde ilgeriletýge tikeleı yqpal etedi», dedi ol.
«AMANAT» partııasy da júıeli túrde ulttyq sportty damytýǵa barynsha qoldaý kórsetip keledi, máselen úsh jyl qatarynan biregeı «Uly dala joryǵy» marafon-báıgesin uıymdastyrýǵa atsalysty.
Bıyl «Altyn tuǵyr» ulttyq syılyǵy 11 nomınasııa boıynsha úzdik sportshylarǵa berildi: kókpar, báıge, toǵyzqumalaq, asyq atý, qusbegi, dástúrli sadaq atý, joryq, aýdaryspaq, jamby atý, teńge ilý, sondaı-aq aqparattyq qoldaý kórsetkeni úshin.
«Kókpar» nomınasııasy boıynsha sportshy Abylaıhan Nyshanbekov, jattyqtyrýshy Erkebaı Omarbek, kommentator Qambarbek Kashıgov jáne tóreshiler Aqylbek Qymyzbaev pen Ǵanı Ahmetbaev marapattaldy.
«Teńge ilý» nomınasııasy boıynsha sportshy Rahat Kombarov pen jattyqtyrýshy Nurjan Ábilqasymov jeńimpaz atandy.
«Jamby atý» nomınasııasy boıynsha sportshy Aqádil Pernebaı men jattyqtyrýshy Sánim Mýradova marapattaldy.
«Aýdaryspaq» nomınasııasy boıynsha júldeler sportshy Syrym Izbasarov pen jattyqtyrýshy Birjan Qosalıevke berildi.
«Joryq» nomınasııasy boıynsha júldeni «Uly dala joryǵy-2024» marafonynyń kúmis júldegerleri atanǵan Almaty qalasynyń komandasy jeńip aldy.
«Dástúrli sadaq atý» nomınasııasynda sportshylar Jánibek Kýlmırzaev pen Aıkórkem Batıhan, sondaı-aq jattyqtyrýshy Dıas Mıllat marapattaldy.
«Báıge» nomınasııasy boıynsha júlde jattyqtyrýshy Torebek Kýrmankalıevke, jokeı Amangeldi Hamza men onyń jylqysy Jelqaraǵa berildi.
«Qusbegi» nomınasııasy boıynsha júldelerdi sportshylar Erasyl Serikbekuly, Beksultan Seıitjan, Imanǵalı Abdýlkarımuly jáne jattyqtyrýshy Eltaı Múptekeev ıelendi.
«Toǵyzqumalaq» nomınasııasynda sportshylar Saltanat Saparbekova, Asylhan Qojanásip jáne jattyqtyrýshy Baýyrjan Tólegenov marapattaldy.
«Asyq atý» nomınasııasy boıynsha syılyq sportshylar Kamıla Danııarovaǵa, Nurqıssa Moljigitovke, jattyqtyrýshy Eskendir Rahmetovke berildi.
Sondaı-aq, ulttyq sport túrlerine turaqty aqparattyq qoldaý kórsetkeni úshin «Qazsport» telearnasynyń ujymy «Aqparattyq áriptes» nomınasııasyn ıelendi.