Búgin depýtat Nurtaı Sabılıanov Májiliste ótken Úkimet saǵatynda temirjol kóligimen tasymaldaý úlesiniń ósýin tejeıtin negizgi faktorlardy atady, dep jazady Egemen.kz.
Depýtattyń aıtýynsha, jyljymaly quramdy jańartý qarqyny onyń qyzmet etý merzimi men tehnıkalyq jaı-kúıi boıynsha paıdalanýdan shyǵyp qalý qarqynyna ilese almaı otyr.
«2014 - 2023 jyldar kezeńinde 928 jańa jolaýshy vagony kelip tússe, fızıkalyq turǵydan tozý sebebine baılanysty 969 vagon paıdalanýdan shyqqan (onyń ishinde 2020 - 2023 jyldar kezeńinde 319 birlik kelip túsken bolsa, 412 birlik paıdalanýdan shyǵarylǵan). Árıne, munyń bári temirjol kóligin damytýdyń negizgi kórsetkishterine áser etedi. Sonymen qatar, temirjol jelileriniń – 54 %-ǵa, lokomotıvterdiń – 61 %-ǵa, vagondardyń – 56 %-ǵa joǵary dárejede tozýy baıqalady. Qanaǵattanarlyqsyz dep baǵalanǵan joldar uzyndyǵynyń úlesi jyl saıyn artyp keledi (2020 jyly – jalpy uzyndyqtyń 16 %-y, 2023 jyly – 28 %-y)», dedi N.Sabılıanov.
Temirjol qurylysy salasynda Prezıdenttiń tapsyrmasy boıynsha 4 iri temirjol jobasy iske asyrylyp jatyr. Olar: «Dostyq – Moıynty», «Baqty – Aıagóz», «Darbaza – Maqtaaral» jáne Almaty qalasyn aınalyp ótetin temirjol jelisi. N.Sabılıanov búgingi tańda 3 joba boıynsha belgilengen merzimde jumystar júrgizilip jatqanmen, halyqaralyq tasymalda asa zor mańyzǵa ıe «Baqty – Aıagóz» baǵytyndaǵy temirjoldyń qurylysy baıaý ekenin tilge tıek etti.
«Uzyndyǵy 297 km bolatyn mańyzdy ınfraqurylymdyq temirjol jobasynyń biri «Baqty – Aıagóz» jobasynyń qurylysy óte baıaý, onda geologııalyq jumystardy bastaýǵa daıyndyq qana júrgizilýde. Bul jobanyń mańyzy óte zor, óıtkeni ol Qytaı men Qazaqstan arasyndaǵy ótkizý qabiletin qosymsha 20 mln. tonnaǵa arttyrýǵa múmkindik beredi. Sondyqtan osy jobanyń qurylys qarqynyn jedeldetip, ony belgilengen merzimde aıaqtaý jóninde sharalar qabyldaý qajet», dedi depýtat.