Búgin Aqtóbe oblystyq qan ortalyǵynda Aqtaýda áýe apatynan zardap shekkenderge qan tapsyrǵysy keletin qala turǵyndary jınaldy, dep habarlaıdy Egemen.kz.
Qan ortalyǵynyń dırektory Altaı Orazbaǵambetovtyń aıtýynsha, turǵyndardyń belsendiligi óte joǵary.
«Turǵyndar qaıǵyly oqıǵaǵa alańdaýly. Biz shuǵyl túrde qan saqtaýǵa arnalǵan arnaıy sterıldi konteınerlerdi satyp alýymyz kerek boldy. Ony búgin Aqtaýǵa muzdatylǵan kúıinde ushaqpen jiberedi. Keshe biz 20 bótelke ambýlın men shokqa qarsy preparattardy jónelttik», dedi bas dáriger.
Qan tapsyrýǵa kelgenderdiń arasynda ázirbaıjandar qaýymdastyǵynyń ókilderi de bar.
«Bizdi bul tragedııa eseńgiretip tastady. Adamdar qaıtys boldy. Bizdiń qaýymdastyq qaza tapqandardyń barlyq otbasylaryna kóńil aıtady. Biz aqsaqaldarmen jáne jastarmen birge zardap shekkenderdi qoldaýǵa keldik. Barlyǵy qan tapsyrady. Zardap shekkender saýyǵyp, otbasylaryna oralsyn», deıdi ázirbaıjandar qaýymdastyǵy tóraǵasynyń orynbasary Vıdadıı Farzalıev.
Qan tapsyrýshylardyń qatarynda ártúrli etnos ókilderi, zeınetkerler, pedagogtar, jastar, qala turǵyndary bar. Nıet bildirýshiler aqparattyq saýalnamalardy toltyryp, dárigerdiń qabyldaýynda bolyp, sodan keıin iriktelgender jalpy zalǵa jiberildi. Kúni boıy jalpy 100-den astam adam qan tapsyrdy.
Aqtóbelikter tapsyrǵan qan búgin Aqtaýǵa jiberiledi.