Hakim Abaıdyń 175 jyldyq torqaly toıy qarsańynda elimizdiń shyǵysynda «Abaı álemi» atty kitaptar toptamasy shyǵa bastaǵan edi. Burynǵy Semeı oblysy danyshpan aqyn atymen qaıta ashylǵanda, bastama jalǵasyn qaıyra tapqan bolatyn. Aımaq basshysy Nurlan Uranhaevtyń qoldaýymen byltyr atalǵan serııa boıynsha jıyrma kitap jaryq kórgen. Onyń bári Astanadaǵy «Folıant» baspasynan basylyp, óńir kitaphanalaryna taratyldy.
Alǵashqy jyly negizinen osy óńirden shyqqan Abaı, Shákárim, Muhtar syndy ulylardyń shyǵarmalary basylǵan. Sonymen birge jergilikti avtorlar men syrttaǵy semeılik qalamgerlerdiń de shyǵarmalary múmkindiginshe keńinen qamtylyp jatyr. Aıtalyq, bıyl A.Espenbetov, T.Janǵalıev, M.Ospanov, A.Ábilqasymov syndy jergilikti jáne Q.Jumadilov, E.Sydyqov, R.Muqanova, D.Seısenuly, Á.Qaıran, S.Qalıev, D.Kápuly, A.Elgezek, S.Dúısenǵazın syndy syrttaǵy semeılik qalamgerlerdiń shyǵarmalary oqyrmanǵa jol tartypty.
Osy avtorlardyń arasyndaǵy Dáýlet Seısenuly júz jyldan astam tarıhy bar «Egemen Qazaqstan» gazetiniń ardageri. Áriptesimizdiń budan buryn «Abaı álemi» atty serııasymen kórnekti abaıtanýshy ǵalym Qaıym Muhamedhanov týraly «Er qazaq» atty kólemdi shyǵarmasy shyqqan. Al osy jolǵy derekti kitaby «Tuǵyry bıik tulǵalar» dep atalady. Onyń alǵashqy taraýynda Abaı men Shákárimniń shyǵarmashylyǵy tilge tıek etilse, ekinshi bóliminde Ertistiń Semeı óńirinen shyqqan B.Tólegenova, K.Sákıeva, T.Bazarbaev, M.Eshekeev, B.Sybanov, J.Kármenov, J.Shákárim, K.Myrjyqbaı, T.Rahımov, K.О́lmesekov syndy jıyrmaǵa jýyq ánshi, kúıshi, bıshiler týraly sóz qozǵaıdy. Ol sonymen birge erteden rýhanııattyń ortalyǵyna aınalǵan kóne Semeıdegi teatr, mýzeı, kitaphana tarıhynan da syr shertedi. Áriptesimizdiń derekti kitabynda sonymen birge ulylar elindegi aıshyqty oryndar men shejireli oqıǵalar da múmkindiginshe qamtylǵan. Al ondaı materıaldardyń ulylar elinde týrızmdi damytýǵa septigi tıetindigine senemiz.
– Osy oraıda, tyń ıdeıaǵa serpin berip otyrǵan oblys basshylyǵymen birge atalmysh serııanyń bas redaktory A.Espenbetov, Abaı kitaphanasynyń dırektory M.Qart jáne atalǵan kitaphananyń qyzmetkeri G.Aıazbaevaǵa qalamgerler atynan alǵys aıtamyn. Abaı teatrynda «Darıǵa-aı» jastar teatrynyń kúshimen jasy júzge kelgen áıgili skrıpkashy Áıtkesh Toǵanbaevtyń ónerdegi qyzyq ta qıyn taǵdyry týraly jazylǵan «Maestro» atty drama-rekvıemimiz qoıyldy. Ulylar eli qaı jaǵynan bolsyn damyp, órkendeı bersin! – deıdi ardager jýrnalıst-jazýshy.
ALMATY