Májilis depýtattary óńirdegi jurtshylyqpen júzdesýin jalǵastyrdy. Keshe bir top halyq qalaýlylary Temirtaý qalasyndaǵy gaz taratý jelileriniń, endi biri Mańǵystaý oblysyndaǵy kún, jel jáne gaz energııasymen jumys isteıtin elektr stansasynyń qurylys barysymen tanysty.
Mańǵaz ólkedegi 247 MVt gıbrıdti elektr stansasynyń qurylysy byltyr bastalǵan. Innovasııalyq joba elimizde alǵash ret júzege asyrylyp otyr. Iske qosylǵan soń kómirqyshqyl gazynyń qaldyqtaryn azaıtady ári 70 adamdy jumyspen qamtıdy. Bul – «QazMunaıGaz» UQ jáne ıtalııalyq «ENI» kompanııasynyń birlesken bastamasy. Bas merdiger – «Hi-Teck «Qazaqstan» seriktestigi. Májilis depýtattary Edil Jańbyrshın men Samat Musabaev sapar barysynda osy stansa basyndaǵy jumys qarqynyn baqylap qaıtty.
«Kún elektr stansasy 50 MVt, jel stansasy 77 MVt jáne gaz stansasy – 120 MVt qýatpen jumys isteıdi. Gıbrıdti stansa Jańaózen qalasyndaǵy kásiporyndardy, munaı óndirýshi kompanııalar men «QazMunaıGaz» gaz óńdeý zaýytyn elektr energııasymen turaqty túrde qamtamasyz etedi. Stansa qurylysyn 2026 jyly aıaqtaý josparlanǵan», dedi E.Jańbyrshın.
Qurylysshylarmen áńgimelesý barysynda depýtattar Parlamentte qabyldanǵan zańdardyń júzege asyrylýy jóninde pikir almasty. Ásirese «Jer qoınaýy jáne jer qoınaýyn paıdalaný» týraly zańnyń artyqshylyqtaryn ortaǵa salyp, bul qujat Prezıdenttiń qoǵamda ádildik ornatýǵa baǵyttaǵanyna nazar aýdardy.
Al «Amanat» fraksııasynyń músheleri Ashat Aımaǵambetov, Nıkıta Shatalov, Baýyrjan Smaǵulov, Únzıla Shapaq, Arman Qalyqov, Qudaıbergen Beksultanov jáne Tilektes Adambekov Temirtaý qalasyndaǵy gaz taratý jelileriniń qurylys barysymen tanysty.
«Qazirgi tańda 4 gaz taratý stansasy iske qosyldy. Josparda taǵy 4 stansany iske qosyp, keıin abonentterdi qosý jumystary júrgiziledi. Munyń barlyǵy ekologııalyq jáne áleýmettik jaǵynan oń áserin beredi, sebebi kómirmen jylytý qıyn ári qymbat. Qazir kómirdiń tonnasy shamamen 25 myń teńge turady, al kógildir otyn odan arzan», dedi depýtat B.Smaǵulov.
Temirtaýda tabıǵı gaz 3 myńnan asa úıge qosylǵan. Aldaǵy ýaqytta taǵy shamamen 3 500 turǵyn úıdi gazben qamtý josparlanyp otyr. Arman Qalyqovtyń aıtýynsha, Prezıdent azamattardy «kógildir otynǵa» qosý jumystaryn jandandyrýdy birneshe ret tapsyrǵan bolatyn. Gazdandyrý kómir generasııasyn paıdalanýdy edáýir qysqartady, ol aýa tazalyǵyn qamtamasyz etedi.
Buǵan qosa májilismender «Qarmet» metallýrgııalyq kombınatynyń gazǵa kóshý barysymen tanysty. Kásiporynda syrtqy jáne ishki gaz qubyry salynady. Jumystardyń 60 paıyzdan astamy aıaqtalǵan. Kombınattyń gazǵa kóshýi mazýtty paıdalanýdan bas tartýǵa múmkindik berip, atmosferaǵa zııandy shyǵaryndylardy kem degende 30 paıyzǵa qysqartýǵa jol ashady.
Depýtattar Janarbek Áshimjanov, Maksım Rojın men Maqsat Tolyqbaı Ile aýdany О́tegen batyr aýylyna arnaıy baryp, Mádenıet úıiniń qurylys barysymen tanysty. О́tegen batyr aýylyndaǵy 400 oryndyq mádenıet úıiniń qurylysy birneshe jylǵa sozylyp keledi. 2022 jyly bastalǵan joba búginde tek jartylaı ǵana aıaqtalǵan.
– Bul – óńirdiń áleýmettik damýy úshin óte mańyzdy joba. Nysannyń quny 2,2 mlrd teńge dep bekitilgen. Qarjy kezeń-kezeńimen bólinip keledi. Degenmen jumys tıisti deńgeıde oryndalmaǵan. 2023 jyly paıdalanýǵa berilýi kerek edi, biraq tek jartysy ǵana daıyn. Qurylys toqtap tur. Bul jerde baqylaýdyń jetkiliksizdigi anyq baıqalady. Halyqqa ýáde berilgen bolsa, ony oryndaý – bizdiń ortaq mindetimiz. Biz bul máseleni qatań baqylaýǵa alamyz jáne barlyq jaýapty taraptardan naqty áreket talap etemiz, – dedi depýtat M.Rojın.
Ile aýdandyq qurylys bóliminiń basshysy Aıdos Kúnesbaıdyń málimetinshe, ótken jyldyń sáýirinde merzimdi taǵy uzartý týraly kelisim jasalyp, jobanyń aıaqtalý ýaqyty 2025 jyldyń shildesine shegerildi. Qazirgi tańda qurylysty tolyq aıaqtaý úshin qosymsha 805 mln teńge qajet. Qazirgi ýaqytta qurylysqa qajetti qarjyny bólý máselesi Almaty oblysynyń bıýdjet komıssııasyna joldanbaqshy.
«Respublica» partııasynyń teń tóraǵasy, Májilis depýtaty Rýslan Berdenov Batys Qazaqstannyń Reseımen shekaradaǵy «Syrym» baqylaý-ótkizý beketinde bolyp, shekaralyq ınfraqurylymdy jaqsartý máselelerin talqylady. Sondaı-aq ol oblys basshylyǵymen, kásipkerlermen jáne belsendi jastarmen kezdesýler ótkizip, óńir turǵyndarynyń ózekti problemalaryn tyńdady.
Jetisý óńirine jumys sapary barysynda Májilis depýtaty, «Aq jol» partııasy fraksııasynyń jetekshisi Azat Perýashev «Taldyqorǵan» ındýstrıaldy aımaǵynda boldy. Birqatar kásiporynnyń, sonyń ishinde «Asma Industrial» akkýmýlıator zaýytynyń jumysymen tanysty. Al Májilis depýtaty, Jalpyulttyq sosıal-demokratııalyq partııasy fraksııasynyń múshesi Ajar Saǵandyqova Shymkent qalalyq Tótenshe jaǵdaılar departamentiniń jumysymen tanysyp, birneshe órt sóndirý beketin aralady.