29 jastaǵy aqtóbelik Ádilhan Qopabaev áıgili «Apple» kompanııasynyń basshylyǵyna taǵaıyndaldy.
Súıinshi jańalyqty Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev óziniń Facebook paraqshasynda málimdedi.
«Otandasymyz, digital nomad Ádilhan Qopabaev «Apple» kompanııasyna jetekshi qyzmetke taǵaıyndalǵanyn qýana habarlaımyn. Endi Ádilhan Ortalyq Azııa jáne Armenııa aımaǵyn qadaǵalaıtyn bolady. Bul jańa kezeń oǵan kóptegen jetistik pen kásibı ósý ákelsin», delingen mınıstr jazbasynda.
Osylaısha, Ádilhan «Apple» kompanııasynda jetekshi qyzmetke taǵaıyndalǵan tuńǵysh qazaq atandy. Ol endi qyzmetin Dýbaıdaǵy keńsede atqarady.
Aıta keteıik, Á.Qopabaev 2017 jyly Ońtústik Koreıadaǵy Ýlsan ulttyq ǵylym jáne tehnologııalar ınstıtýtyn (UNIST) «qala ınjeneri jáne tehnologııalyq menedjment» mamandyǵy boıynsha úzdik támamdaǵan. Bedeldi UNIST Global Uni-Star stıpendııasynyń ıegeri. 2021 jyly AQSh-tyń Provıdens qalasyndaǵy Braýn ýnıversıtetinde memlekettik basqarý magıstri atanyp, Rokfeller qorynyń stıpendııasyn jeńip aldy.
Al eńbek jolyna toqtalsaq, «Apple» kompanııasyna deıin ol halyqaralyq konsaltıngtik jáne IT-kompanııalarda qyzmet atqarǵan. 2023 jyldan bastap Energetıka mınıstrligine qarasty «Munaı jáne gaz aqparattyq-taldaý ortalyǵyn» basqardy. Sonymen qatar munaı-gaz salasynyń «Jaǵdaılyq-taldaý ortalyǵy» basqarmasynyń tóraǵasy boldy. Al 2024 jyly Prezıdent janyndaǵy Jastar saıasaty keńesiniń quramyna endi. Ádilhannyń jańa belesi – elimizdegi mamandardyń halyqaralyq deńgeıde joǵary baǵalanýynyń aıqyn kórinisi. Onyń bul qyzmetine tek tabys tileımiz.