Oqýshynyń biregeı jobasy atom elektr stansııalarynyń (AES) elektr energııasyn óndirýdegi tıimdiligin zertteýge baǵyttalǵan, dep habarlaıdy Egemen.kz.
Jas ónertapqysh – Aqtóbe oblysyndaǵy Qarǵaly aýdanyna qarasty Álimbetov aýylynyń 4-synyp oqýshysy Nurtalap Baqytjanov.
Oqý-aǵartý mınıstrliginiń baspasóz qyzmetiniń málimetinshe Nurtalap qurastyrǵan maket sýdy qaınatyp, 2-2,5 atmosferalyq qysymda bý energııasyn alady. Bul energııa týrbına arqyly mehanıkalyq energııaǵa, odan ári elektr energııasyna aınalady. Maket reaktor, bý týrbınasy, generator, energııa taratý qubyrlary, gradırnıa, sýytý basseıni sekildi naqty quramdas bólikterden turady.
«Men AES qurylysyn zerttep, elektr energııasyn tıimdi óndirýdiń joldaryn izdeýdi maqsat ettim. Álemdegi AES-tiń jumys prınsıpteri men qurylymyna taldaý jasap, shaǵyn maket jasaý úshin fızıka men kosmos salasyndaǵy derekterdi zerttedim», deıdi Nurtalap.
Ol - «Zerde» ǵylymı jobalar baıqaýynyń turaqty qatysýshysy. Birneshe baıqaýlardan marapat jeńip alǵan daryndy oqýshy.
Nurtalaptyń armany – ınjener bolý jáne ártúrli energııa kózderinde jumys isteıtin qurylǵy jasaý eken.