Túrkistan oblysynda dárigerler 6 jasar qyzdyń asqazanynan uıysyp qalǵan shash alyp shyqty, dep habarlaıdy Egemen.kz.
Anasynyń aıtýynsha, qyzdyń asqazan aımaǵy aýyrsynyp, álsizdik, tábettiń bolmaýy, salmaǵynyń tómendeýi sııaqty shaǵymdary bolǵan.
«Naýqastyń asqazanyn tekserý kezinde salmaǵy bir kelige jýyq shashtyń túıini anyqtaldy. Hırýrgter birden bir saǵatqa sozylǵan ota jasady. Erteńinde qyz qarapaıym palataǵa aýystyrylyp, bir aptadan keıin úıine shyǵaryldy», dep jazady basylym.
Balalar hırýrgy mundaı jaǵdaı balalarǵa jetkiliksiz kóńil bólýden týyndaıtynyn atap ótti.
«Kishkentaı balalar aýyzdaryna ártúrli zattardy jıi salady, bul olardyń ómirine úlken qaýip tóndirýi múmkin. Ata-analardy muqııat bolýǵa shaqyramyz», dedi ol.