Úkimet qaýlysyna sáıkes Álııa Moldaǵulova atyndaǵy halyqaralyq áýejaı bazasynda «Aqtóbe» arnaıy ekonomıkalyq aımaǵy (AEA) quryldy, atalǵan aımaq 2049 jyldyń sońyna deıin jumys istemek, dep habarlaıdy Egemen.kz oblys ákimdiginiń baspasóz qyzmetine silteme jasap.
Aqtóbe oblysynda AEA qurýdyń negizgi maqsaty – ınvestısııa tartý, óńdeý ónerkásibin damytý jáne ımportqa táýeldilikti tómendetý. Jobany júzege asyrý arqyly jańa jumys oryndary qurylyp, otandyq taýarlardyń básekege qabilettiligi artady, sondaı-aq ekonomıkadaǵy baılanysty salalardyń damýyna yqpal etedi.
«Aqtóbe» AEA negizgi mindetteri óńirdiń ekonomıkalyq ósimin yntalandyrýǵa, ınvestısııalyq ahýaldy jaqsartýǵa, ónerkásiptiń jańa ósý núktelerin qalyptastyrýǵa baǵyttalǵan.
Arnaıy ekonomıkalyq aımaq jalpy 858 gektar aýmaqty qamtıdy.
Kólik-logıstıkalyq baǵyttaǵy 9 negizgi sala men ónerkásiptiń 29 baǵytyn damytý josparlanǵan. Qazirgi zamanǵy óndirister qurýǵa, ınnovasııalyq tehnologııalardy engizýge jáne otandyq ári halyqaralyq jetekshi kompanııalardy tartýǵa basa nazar aýdarylady.
AEA qatysýshylary retinde ekonomıkanyń túrli sektorlarynda qyzmet etetin jergilikti jáne sheteldik ınvestorlar bola alady. Sondaı-aq, birneshe kompanııa birlesken jobalar ázirleýine, ortaq resýrstardy paıdalanýyna múmkindik beretin klasterler qurý kózdelgen.
Al ınvestorlarǵa jeńildikter men preferensııalar qarastyrylǵan: birinshiden, korporatıvtik tabys salyǵynan bosatylady, ekinshiden, AEA aýmaǵynda satylatyn taýarlarǵa QQS mólsherlemesi – 0%, úshinshiden, jer jáne múlik salyqtarynan, sondaı-aq jer ýchaskesin paıdalanǵany úshin tólemnen bosatylady. Tórtinshiden, AEA aýmaǵynda ornalastyrýǵa nemese paıdalanýǵa arnalǵan taýarlar úshin kedendik baj salyǵynan bosatý; besinshi - kvotasyz jáne ruqsatsyz sheteldik jumys kúshin tartý; altynshy AEA aıasynda jobalardy iske asyrý úshin qajetti ınjenerlik-kommýnıkasııalyq ınfraqurylymdy qamtamasyz etý jáne jer telimin jalǵa berý (AEA jumys istegen merzimi, keıinnen basym quqyqpen satyp alý múmkindigimen).
Qazirgi ýaqytta «Aqtóbe» arnaıy ekonomıkalyq aımaǵynyń (AEA) syrtqy jáne ishki ınjenerlik jelileriniń qurylysy áli bastalǵan joq. Qurylys jumystary respýblıkalyq bıýdjetten 16 mlrd teńge kóleminde qarjy bólingen soń, 2025-2026 jyldary júrgiziledi.