«Altyn jas» jobasy Qaraǵandyda da qanat qaqty. Baǵdarlamany júzege asyrýǵa oblystyq bıýdjetten arnaıy qarjy bólindi. Qazirgi ýaqytta jekemenshik bilim berý ortalyqtary kóp. Zeınetkerlerdiń kóbisi sol jerde sabaq berip júr.
Oblys ákimdigimen aımaqtaǵy 146 bilim berý ortalyǵy osy joba aıasynda kelisimshartqa qol qoıǵan. Ortalyqtarǵa 96 zeınetker jumysqa qabyldanǵan. Joba aıasynda jumysqa ornalasqan zeınetkerler «2025–2027 jyldarǵa arnalǵan respýblıkalyq bıýdjet týraly» zańmen bekitilgen eń tómengi jalaqy mólsherin, 85 myń teńge alady. Zeınetker jalaqysynyń jartysy sýbsıdııalansa, qalǵan jartysy jeke kásipkerdiń esebinen tólenedi.
Qaraǵandy oblysy boıynsha eńbek mobıldiligi ortalyǵynyń dırektory Nurjan Syzdyqov ortaq kelisimge kelgen bilim berý uıymdaryna 641 zeınetkerdi jumysqa ornalastyrýdy oılastyryp otyrmyz deıdi. Osy maqsatta jumys berýshi tarap aldyn ala Mansap ortalyqtaryna ótinish beredi. Joba aıasynda jumysqa qabyldanýǵa erler – 63 jastan, áıelder – 61 jastan asyp baryp qana ótinish joldaı alady.
– «Densaýlyǵym jaqsy, jumys isteýge shamam keledi, nıetim bar» degen zeınetkerler bolsa, bizdiń taraptan qoldaý bar. Eger ol kisi basqa salada qyzmet istep zeınetke shyqsa, onda kúzet qyzmetine ornalastyra alamyz. Habarlasqan ár zeınetkerge jumys usynamyz. Jyl sońyna deıin 500-ge jýyq zeınetkerdi jumyspen qamtysaq dep otyrmyz, – deıdi N.Syzdyqov.
«Altyn jas» jobasy aıasynda jumys istep jatqan zeınetkerdiń biri – Lázzat Asylbekova. Pedagog Qarqaraly aýdany, Tomar aýylynyń mektebinde 42 jyl bastaýysh synyp muǵalimi bolyp eńbek etip zeınetkerlikke shyqqan. Qoly bosap, qalaǵa qonys aýdarǵan soń úıge syımadym deıdi. Jobanyń sharapatyn sezingen ustaz «Qazsarapservıs» JShS-na tıesili ortalyqta jumysqa qabyldanady. Mektepke deıingi daıarlyq bóliminde sabaq beredi. Ázirge túske deıin balaǵa, tústen keıin 2-4 synyp aralyǵyndaǵy 8 balaǵa qosymsha sabaǵyn ótkizedi.
Bul ortalyqta joba aıasynda jumys istep jatqan ázirge Lázzat Káribaıqyzy ǵana. Ortalyq basshysy eki aǵylshyn tili men eki bastaýysh synyp muǵalimin jumysqa alýǵa ótinish berip qoıypty. Olardyń da jumysqa ornalasatyn kúni alys emes.
Darııa Nýrekına da osy jobamen jumysqa ornalasqan zeınetkerdiń biri. Ol Qaraǵandydaǵy «Aisha» JShS tıesili «Happy kids» ortalyǵynda mektepke daıarlyq kýrsyn ótkizedi. Ǵumyr boıy ustazdyq qyzmet atqarǵan. Shet aýdany, Aqjal kentindegi mektepte 44 jyl bastaýysh synyp muǵalimi bolyp eńbek etken. Zeınet demalysyna 2016 jyly shyǵyp, qalaǵa qonys aýdarady. On jylǵa jýyq ýaqyt ótken soń súıikti jumysymen qaıta qaýyshady. Joba jaıly áleýmettik jeliden kórip qalǵan zeınetker bul múmkindikti qalt jibermeıdi.
– Zeınetke shyqqannan keıin biraz ýaqyt dem aldym. Qyryq jyl ǵumyrymda taqta aldynda turǵannan bolar, úıde kóp otyra almadym. Balalarym kúni boıy jumysta. Nemerelerim de sabaqta. Úıde ózim ǵana qalamyn. Jumys izdep kórip edim, áleýmettik jeliden «Altyn jas» jobasy týraly bildim. Tolyq aqparat alyp, ótinish qaldyrdym. Jumys ornym úıdiń irgesinde. Jaıaý qatynaımyn. Jobanyń jetekshilerine alǵystan basqa aıtarymyz joq, – deıdi D.Nýrekına.
Qazir Darııa Jamanqulqyzynyń 10 oqýshysy bar. Tańerteńgi 9-dan 12-ge deıin mektepke daıarlyq kýrsyn ótkizse, tústen keıin 7-13 jas aralyǵyndaǵylarǵa qosymsha sabaq beredi. Oqý úlgerimi jaqsarǵan balalardyń ata-analary bilikti pedagogke alǵys bildiredi.
«Happy kids» ortalyǵy eki aýysymmen jumys isteıdi. Munda bastaýysh synyp oqýshylary men mektepke daıarlyq jasyndaǵy, ıaǵnı besten jeti jasqa deıingi balalar dáris alady.
– Búginde balalar bes jasta balabaqshany támamdaıdy. Kóp ata-ana balasyn mektepke erte bermeıdi. Osy másele jóninde ata-analar usynys bildirgen soń kýrsty qolǵa aldyq. Munymen qosa bastaýysh synyp oqýshylaryna arnalǵan «Uzartylǵan kún toby» baǵdarlamasy sátti jumys istep tur. Ata-analardyń ótinishimen baǵdarlamaǵa balany tasymaldaý qyzmetin de qostyq. Mektepten balany ózimiz alyp kelip, úı tapsyrmasyn birge oryndaımyz. Tamaǵyn da osy jerde ishedi, – deıdi qazaq tili men ádebıeti páni muǵalimi Ásııa Ryshken.
Qaraǵandy oblysy