Til bilýdiń paıdasy ushan-teńiz. Ǵylym dáleldegen, zertteýler kórsetken aıǵaqty artyqshylyqtaryn shyp-shyrǵasymen túgendeýge kirissek, esebine jetip bolmaımyz. Biraq til syndyrý – ońaı emes. Qanshama adam aǵylshyn tilin talaı ret qursaýǵa alyp, baǵynyshqa túsirýge tyrysqanymen, alynbas qamaldan asa almaıtynyn túsinip, birjola qol siltegen bolýy da múmkin. Al 17 jastaǵy Saıa Qydyráli halyqaralyq «IELTS» emtıhanyn 20 márte tapsyryp, nátıjesinde eń joǵary 9 balǵa qol jetkizdi. Bul – álemdik rekord.
«Qataryńnyń aldy bol» deıdi bataly sózde. Talap, talantymen kópti tánti etken Saıa qazir qatarlastaryn basyp ozyp, úlkenderdiń ózine úlgi bolyp júr. Alǵyr qyz aǵylshyn tilin tez úırenýdiń tetikterin alty jasynda meńgerip, nebári toǵyz jasynda ózgelerge shet tilin úırete bastaǵan. Al on tórt jasynda ol eki birdeı oqý ortalyǵyn ashqan.
«Bıyl 11-synypty támamdaımyn. Odan soń birden oqýǵa túspeımin. Bir-eki jyl ózimdi tanyp, baǵytymdy aıqyndaǵym keledi. Árıne, joǵary bilim alamyn. Biraq asyǵystyq tanytýdyń qajeti joq. Bolashaqta álemniń birneshe memleketinde óz mektebimdi ashý josparda bar. Al «IELTS» emtıhany týraly aıtatyn bolsaq, adamnyń qabileti men múmkindigi ǵalamat. Tek óz boıyndaǵy sol bólekshe qasıetti durys júıe arqyly udaıy jetildire bilý kerek. 14 jasyma deıin uıaly telefon qoldanbaıtynmyn. Zeıinim tek oqýda boldy. Abaı atamyz Otyz segizinshi qarasózinde «Ǵylym-bilimdi áýel bastan bala ózi izdenip tappaıdy. Basynda zorlyqpenen ıakı aldaýmenen úıir qylý kerek, úırene kele ózi izdegendeı bolǵansha» deıdi ǵoı. Sondyqtan shet tiline qyzyǵýshylyǵymdy oıatqan anama alǵys aıtqym keledi», deıdi Saıa Qydyráli.
Statıstıkaǵa súıensek, jyl saıyn 3,5 mıllıonnan astam adam «IELTS» emtıhanyn tapsyrady. Al eń joǵary 9 balǵa úmitkerlerdiń nebári 0,5 paıyzy ǵana qol jetkize alady. Sondyqtan Saıanyń bul jetistigi rasymen tańdaı qaqtyrarlyq. Úırenýden jalyqpaıtyn, úıretýden aıanbaıtyn janǵa tek sát-sapar tileımiz.