Astanada Oqý-aǵartý mınıstrliginiń uıymdastyrýymen «Jumysshy mamandyqtary qalasy» festıvali bastaldy. Saltanatty jıynǵa Premer-mınıstrdiń orynbasary Tamara Dúısenova, Oqý-aǵartý mınıstri Ǵanı Beısembaev, sondaı-aq iri kompanııalar men kásiporyndardyń ókilderi, sarapshylar jáne kolledj stýdentteri qatysty.
Festıvaldyń ashylýynda sóz sóılegen Premer-mınıstrdiń orynbasary Tamara Dúısenova jumysshy mamandyqtary el ekonomıkasynyń tiregi ekenin atap ótti.
«Búgin jumysshy mamandyqtarynyń qanshalyqty ózgergenine kýá bolyp otyrmyz. Buryndary bul mamandyqtar aýyr ári qarapaıym eńbekpen baılanysty dep eseptelse, qazir jaǵdaı múlde basqa. Osy kúni jumysshylar zamanaýı tehnologııalardy basqaratyn, úlken óndiristik úderistiń mańyzdy bóligine aınalyp otyr. Festıval jastardyń suranysqa ıe mamandyqty tanyp-bilýine, sol salany tańdaýyna múmkindik beredi», dedi Úkimet basshysynyń orynbasary.
Atalǵan jıynda Oqý-aǵartý mınıstri Ǵanı Beısembaev tehnıkalyq jáne kásiptik bilim júıesin úlken ózgeris kútip turǵanyn aıtty.
«Bıyl 1 qyrkúıekten bastap kolledjderdi qarjylandyrý kólemi eki esege ulǵaıady. Qazirgi ýaqytta kolledjderge 518 kásiporyn sheftik qamqorlyq kórsetedi, al bolashaqta olardyń sanyn 4 myńǵa deıin arttyramyz. Sonymen qatar Jumysshy mamandyqtary jylynda iske asyrylatyn negizgi is-sharalardyń biri – elimizdiń 10 kolledjin ınternasıonaldandyrý bolmaq. Mundaǵy negizgi maqsat — olardyń jahandyq deńgeıde básekege qabilettiligin arttyrý jáne bilim baǵdarlamalaryn halyqaralyq standarttarǵa sáıkestendirý. Osy maqsatta atom energetıkasy salasynyń mamandaryn daıarlaýda Majarstannyń tájirıbesin engizý, sondaı-aq Qytaıdyń IT, dron qurastyrý, mashına jasaý salasyndaǵy tájirıbesin qoldaný josparlanyp otyr», dedi Ǵanı Beısembaev.
Mınıstrdiń aıtýynsha, bıyl Astanada tehnıkalyq jáne kásiptik bilim uıymdarynyń stýdentterin qoldaý ári damytý maqsatynda Ulttyq quzyrettilik ortalyǵy qurylmaq. Mundaı ortalyq Qytaıda, Ońtústik Koreıada jáne BAÁ-de tabysty nátıje kórsetip keledi. Al osy kúzde Aqtaýda «TurkicSkills», ıaǵnı túrkitildes elder arasynda I kásibı sheberlik chempıonaty ótpek.
Aıta keteıik, «Jumysshy mamandyqtary qalasynda» segiz taqyryptyq kóshe ashyldy. Atap aıtsaq, munda taý-ken isi jáne metallýrgııa, mashına jasaý jáne kólik, energetıkter men munaıshylar, aýyl sharýashylyǵy men sý sharýashylyǵy mamandary, qurylysshylar, qutqarýshylar, órt sóndirýshiler, medısına, týrızm, sondaı-aq bolashaq mamandyqtaryna arnalǵan kósheler bar. Sonymen qatar «Jumysshylar qalasynda» 40 kreatıvti úı turǵyzylǵan. Iаǵnı festıvalǵa qatysýshylar túrli kásiptiń ereksheligimen tanysyp, zamanaýı jabdyqtarmen ózderi jumys istep kóre alady. Bes kún boıy qala aýmaǵynda túrli semınar men sheberlik dárisi, hakaton, kásipter sherýi, bos oryndar jármeńkesi, startaptardyń tusaýkeserleri, konsertter men trenıngter ótedi. Festıval barysynda qonaqtar óndiris úderisine tikeleı aralasyp, ózderin naǵyz óndiris jelisinde otyrǵandaı sezine alady. Sonymen birge mashınalar men qurylǵylardy qolmen qurastyryp, jumysshy mamandyqtarynyń qyr-syryn túsinedi. Oqýshylar men stýdentter zamanaýı tehnologııalardyń mańyzyn uǵynyp, eńbek naryǵynda suranysqa ıe jańa kásiptermen tanysady.
Oqý-aǵartý vıse-mınıstri Edil Ospannyń aıtýynsha, festıvaldyń negizgi maqsaty – jumysshy mamandyqtarynyń qazirgi zaman talabyna saı ózgergenin kórsetý, ásirese balalar men jastarǵa tanystyrý. О́ıtkeni kópshilik arasynda jumysshy mamandyqtary aýyr qara jumys degen túsinik qalyptasqan. Alaıda qazirgi tańda bul salalar joǵary tehnologııalarmen jabdyqtalyp, avtomattandyrylǵan, sıfrlyq múmkindikterge negizdelgen. Minekı, osy «jumysshy qalasyna» kelgen qonaqtar ártúrli mamandyqtyń jańa tehnologııalarymen baılanysyn, olardyń eńbek naryǵyndaǵy mańyzyn jete uǵynady.
«Festıvalǵa 30 myńnan astam adam, onyń ishinde kóptegen mektep oqýshylary men stýdentter qatysady dep kútilip otyr. Birinshi kúnniń ózinde 5 myńnan astam qonaq kelip, túrli óndiris salasymen tanysyp, ózderin qyzyqtyrǵan suraqtarǵa jaýap aldy. Jańa oqý jylynan bastap kolledj stýdentterine bólinetin memlekettik qarjylandyrý eki ese ósedi. Naqtyraq aıtsaq, ár stýdenttiń jan basyna shaqqandaǵy qarjysy 412 myń teńgeden 937 myń teńgege deıin ulǵaıady. Qazir elimizde birneshe kolledj men kásiporyndar arasynda jańa formattaǵy seriktestik ornatylǵan. Mysaly, «SaryarqaAvtoProm» jáne Qostanaı memlekettik kolledji birlesip, jyl saıyn 250 maman daıarlaıdy. Iаǵnı stýdentter kolledjde oqyp júrip-aq kásiporynda tájirıbeden ótedi. Oqý bitirgennen keıin birden jumysqa ornalasady. Bul júıe bilim men tájirıbeni biriktirip, bilikti mamandar daıarlaýǵa múmkindik beredi», deıdi vıse-mınıstr.
Iá, osy kúni zamanaýı tehnologııalardyń damýyna baılanysty jumysshy mamandyqtary da ózgeriske ushyrap jatyr. Mysaly, ken oryndaryn drondar arqyly baqylaıtyn kúnge jettik. Buryn shahterler shahtaǵa túsip, qaýipti jaǵdaıda jumys istese, endi bul úderisti vırtýaldy kózildirik pen jańa tehnologııalardyń kómegimen jer ústinen basqarýǵa bolady. Odan bólek, aýyl sharýashylyǵyndaǵy dron operatorlarynyń da paıdasy ushan-teńiz. О́ıtkeni bul qurylǵy egistik alqaptaryn baqylaý, tyńaıtqysh sebý, sýarý júıelerin qadaǵalaý sııaqty jumystardy tyńǵylyqty atqarady. Minekı, «Jumysshy mamandyqtary qalasynda» osy sekildi zamanaýı tehnologııalar kópshilikke tanystyryldy.
Aıta keteıik, atalǵan festıval — Jumysshy mamandyqtary jylynyń betashary ispetti. Bul – bolashaq mamandardyń, jumys berýshilerdiń, tehnıkalyq jáne kásiptik bilim uıymdarynyń ózara yntymaqtastyǵy úshin qurylǵan alań. Festıvaldyń biregeı formaty qonaqtarǵa ártúrli kásiptiń erekshelikterimen tanysýǵa jáne ınteraktıvti alańdar men mamandandyrylǵan jabdyqtardyń kómegimen ekonomıkanyń túrli salasynda ózderin synap kórýge múmkindik beredi.