Astanada «eki qolǵa – bir kúrek» tappaı júrgen qala turǵyndarynyń jumys taýyp, qarjylyq jaǵdaıyn jaqsartýǵa múmkindik beretin «Joltap» jobasy bıyl da jalǵasady. Áleýmettik joba aıasynda kúni búginge deıin 9 myńnan asa astanalyq biliktiligin arttyryp, eńbekke aralasty.
Igi joba Memleket basshysy Qasym-Jomart Toqaevtyń tapsyrmasy aıasynda elorda ákimdigi men «Jańa múmkindik» qoǵamdyq qorynyń birlesýimen júzege asty. Munda oqytý baǵdarlamalary eńbek naryǵynyń suranysyna saı qurylady. Máselen, 18 ben 50 jas aralyǵyndaǵy azamattarǵa sıfrlyq daǵdylardy tegin oqýǵa bolady.
«Joltap»-tyń «Bazalyq sıfrlyq daǵdylar» kýrsynyń oqytýshysy Dıas Mahatovtyń sózinshe, búginde jastar arasynda bul salaǵa degen qyzyǵýshylyq joǵary.
– Byltyr sáýir aıynan bastap joba qatysýshylaryna sıfrlyq daǵdylardy úıretip jatyrmyn. Bes kúndik oqytý kýrsynda kompıýtermen jumys isteý tásilderi men tájirıbelik jumysqa basa nazar aýdarylady. Stýdentterge arnaıy jabdyqtalǵan kabınetterde «Microsoft Office» sekildi qajetti baǵdarlamalardy ornatý ádisteri kórsetiledi. Qatysýshylarǵa mindetti túrde sertıfıkat beriledi. Qazirgi ýaqytta 330-ǵa jýyq elordalyq osy baǵytta oqýyn sátti aıaqtap, arnaıy qujat aldy. Kýrstar sıfrlyq jáne jumys daǵdylarynyń keń aýqymyn qamtıdy. Jańa múmkindik ashyp, qatysýshylarǵa Astananyń zamanaýı kásiporyndarynda jumysqa ornalasýǵa ne óz kásibin ashýǵa jol ashady, – dedi D.Mahatov.
Áleýmettik bastamaǵa qatysty astanalyqtardan 100 myńnan asa ótinish túsken. Al aqparattyq ortalyq qyzmetin atqaratyn modýldik pýnktterde 26 myń adam keńes aldy. 3 myń azamatqa sıfrlyq kómek kórsetildi. Mamandar elektrondy sıfrlyq qoltańba alýǵa, mektep, balabaqsha jáne baspanaǵa kezekke turýǵa járdemdesken.
Kýrsty sátti aıaqtap, qajetti daǵdylardy meńgergen 5 myń qatysýshy túrli salada, aıtalyq, qalalyq ónerkásiptik kásiporyndarǵa, servıstik kompanııalarǵa jumysqa ornalasty. Sonymen qatar sheberhanalar, dúkender jáne frılans jobalary sııaqty jeke kásipterin ashyp úlgerdi.
Astanalyq Aısulý qazir jıhaz dızaıny salasynda jumys isteıdi. Dekrettik demalystaǵy bos ýaqytyn paıdalanyp, ózine tańsyq mamandyqty meńgerýdi oılaıdy. Osylaısha joba kómegimen aldymen jıhaz qurastyrýshy, keıin mobılografııany meńgeredi.
– «Instagram» jelisindegi habarlamaǵa kózim tústi. Muny ózimdi damytýǵa, kózqarasymdy keńeıtýge jáne jańa mamandyqty ıgerýge qajet múmkindik dep kórdim. Osyǵan deıin jıhaz jasaý salasynda jumys istegenmin, biraq júıeli bilim jetispeıtin. «Joltap» kýrstary maǵan bar bilgenimdi júıeleýge jáne jańa daǵdylardy meńgerýge kómektesti. Biz ólshemderdi esepteýdi, materıaldardy tańdaýdy jáne jıhaz qurastyrýdy úırendik. Kýrs aıaǵynda jıhazdy óz betimshe qurastyra alatyn boldym. Bul bilim mamandyǵyma degen senimdilikti arttyrýǵa jáne biliktiligimdi keńeıtýge septigin tıgizdi. Kóp uzamaı kásibı mobılografııany da oqyp aldym. Iаǵnı kásibı quzyrettiligimmen qatar, tabysymdy arttyrýǵa serpin berer jańashyldyqty úırendim, – dep atap ótti joba túlegi.
Aıta ketý kerek, jobany júzege asyrýdaǵy mańyzdy qadamnyń biri jumys berýshilerdi bilikti mamandarmen baılanystyrýǵa kómektesetin, oqytý men qaıta daıarlaýdyń túrli quraldaryn usynatyn «Jumystap.kz» platformasyn ashý bolǵan. Mine, búginde qosymsha qalanyń mamandarǵa degen suranysyn jedel sheshe otyryp, kadr tapshylyǵy men jumyssyzdyq máselesinde mańyzdy elementke aınaldy.
– Basqa jıhaz jasaýshylar sekildi eń aldymen óz úıime qajetti shkaf jasadym. Nátıjesin kórgen soń bul ispen kásibı túrde aınalysýdy nıet etip, elordadaǵy jıhaz sehtarynyń birine jumysqa ornalastym. Onda qurastyrý jáne montajdaý negizderin úırenip, qosymsha osy salaǵa qatysty ınternette qoljetimdi aqparattardy zerttedim. Jıhaz jasaǵannan keıin ony tıimdi satý joldaryn bilý úshin «Joltap»-tyń «Targetolog» kýrsyna qatysýǵa ótinish bildirdim. Ári qaraı jobaǵa óz usynymdy bildirip, jańadan ashylǵan kýrstyń oqytýshysy boldym. Bastama elorda turǵyndaryna 10 jumysshy jáne 8 sıfrlyq kásip boıynsha oqýdan ótýge biregeı múmkindik beredi. Jumys daǵdylary kóbine tiginshi, modeler-konstrýktor, býhgalterlik esep, shkaf jıhazyn jasaý negizderi, kassır-satýshy, aıaqkıim jóndeý sheberi, Kaspi saýda, elektr jáne gazben dánekerleýshi, maı aýystyrý jáne dóńgelek jóndeý, barısta. Oǵan qosa SMM, veb-saıt ázirleýshi, vıdeo montaj, grafıkalyq dızaın, kontentmeıker, mobılografııa, marketolog syndy zamanaýı baǵyttary da bar, – dedi «Joltap» jobasyndaǵy «Korpýsty jıhaz jasaý negizderi» kýrsynyń oqytýshysy Marat Bazarbekov.
Jalpy, byltyr Astanada «Joltap» jobasy sekildi basqa da jumyspen qamtý sharalary kómegimen 23,3 myń adam eńbekke aralasty. Onyń 13,7 myńy – jastar. Jumys oryndaryn qurýdyń О́ńirlik kartasyn iske asyrý sheńberinde 67 634 jumys orny quryldy. Negizgi baǵdarlamalar qatarynda «Jastar praktıkasy», «Qoǵamdyq jumystar», «Alǵashqy jumys orny» jáne jaz mezgilinde elordany abattandyrýǵa úles qosatyn «Jasyl el» jobasy bar.
Ulttyq statıstıka bıýrosynyń málimetterine súıensek, elordada NEET sanatyndaǵy jastardyń úlesi 6,1%-dy nemese 26 447 adamdy quraıdy. Astanalyq jastar saıasaty máseleleri basqarmasynyń basshysy Samat Ibraevtyń aıtýynsha, joǵaryda atalǵandarǵa qosymsha 35-ke deıingi azamattardy áleýmettendirý úshin birqatar joba júzege asyrylyp jatyr.
– 2024 jyly «Taza Qazaqstan» aksııasy barysynda zııandy ádettermen kúresý maqsatynda nasybaıdy órteý jáne «Táýeldilikti sportqa aıyrbasta» ataýymen naýqan ótkizildi. Al esirtki zattary týraly jarnamalyq jazýlardy boıaý boıynsha reıdter uıymdastyryldy. Ekologııalyq sharalar aıasynda jastar «Taza dúısenbi», «Sátti sársenbi», «Jasyl Astana» aksııalaryna belsendi qatysyp, qalany kógaldandyrý jáne tazalaý jumystaryna atsalysty. О́tken jyly oıynqumarlyqtyń aldyn alý baǵytyndaǵy jumystar kúsheıtildi. Psıhıatrlar men narkologterdiń qatysýymen kolledj stýdentterimen 8 kezdesý ótkizilip, 500-den asa aqparattyq býklet pen paraqsha taratyldy. «Eriktiler mektebi» aıasynda 2024 jyly volonter ShYU sammıti (200 erikti) jáne Dúnıejúzilik kóshpeliler oıyndary (1 600 erikti) sııaqty halyqaralyq is-sharalarda belsendi boldy. «Jas sarbaz» jobasy sheńberinde jastardy patrıottyq rýhta tárbıeleý maqsatynda is-sharalar uıymdastyrylyp, 110 mektep pen 35 kolledjde 10 myńnan asa jas oqıtyn «Jas sarbaz» synyptary men klýbtary ashyldy. Astana jastaryna qoldaý kórsetý maqsatynda túrli jobalar men bastamalardy júzege asyryp, olardyń damýy men júzege asyrlýy úshin qolaıly orta qalyptastyrylyp jatyr, – dedi basqarma basshysy.