Londonda Qazaqstan – Ulybrıtanııa strategııalyq dıaloginiń 8-otyrysy ótti. Jıynda Ulybrıtanııada maýsymdyq jumysshylar baǵdarlamasy aıasynda jumys isteıtin otandastarymyzdyń quqyn qorǵaýǵa baǵyttalǵan memorandýmǵa qol qoıyldy.
Dıplomatııalyq qatynastardyń ornaǵanyna 33 jyl tolýyn atap ótken kezdesýde Qazaqstan Syrtqy ister mınıstriniń orynbasary Roman Vasılenko men Ulybrıtanııa Syrtqy ister mınıstrliginiń memlekettik mınıstri Stıven Daýtı tóraǵalyq etti.
Dıalog barysynda delegasııalar saıasat, ekonomıka, ınvestısııalar, energetıka, ekologııa, mádenıet, bilim jáne qaýipsizdik salalaryndaǵy ózara is-qımyl máselelerin talqylady. Sondaı-aq ótken jyldyń sáýir aıynda qol qoıylǵan Qazaqstan men Ulybrıtanııa arasyndaǵy Strategııalyq áriptestik jáne yntymaqtastyq týraly kelisimdi ratıfıkasııalaý barysy qaraldy. Taraptar óńirlik jáne halyqaralyq kún tártibindegi ózekti máseleler jóninde pikir almasty.
R.Vasılenko eki eldiń syrtqy saıası vedomstvolary arasyndaǵy joǵary deńgeıdegi saıası dıalog pen tıimdi baılanystardy quptap, olardyń kópjaqty yntymaqtastyqty tereńdetýge yqpal etetinin atap ótti.
«2024 jyly ótkizilgen is-sharalar, sonyń ishinde Qazaqstan Prezıdenti Qasym-Jomart Toqaevtyń Ulybrıtanııa Premer-mınıstri Kır Starmermen Bakýde ótken COP29 klımattyq konferensııasy aıasyndaǵy kezdesýiniń ekijaqty yntymaqtastyqty jandandyrýǵa jáne nyǵaıtýǵa degen ózara umtylysty kórsetti. Osyǵan baılanysty Strategııalyq dıalog aıasynda saýda-ınvestısııalyq seriktestikti keńeıtý, iskerlik baılanystardy nyǵaıtý jáne mádenı-gýmanıtarlyq yntymaqtastyqty damytýǵa erekshe kóńil bólindi», dedi vıse-mınıstr.
Ulybrıtanııa – Qazaqstan ekonomıkasyna mol qarjy quıatyn 10 iri ınvestordyń qatarynda. El ekonomıkasyna salynǵan ınvestısııa kólemi 18 mlrd dollardan asady. Qazaqstanda brıtandyqtardyń qatysýymen 550-ge jýyq kompanııa jumys isteıdi.
Al Qazaqstan – Ulybrıtanııa strategııalyq dıalogi – ekijaqty yntymaqtastyqtyń ınstıtýsıonaldyq tetikteriniń biri. 2013 jyldan beri ótkizilip kele jatqan bul kezdesýler ekijaqty qarym-qatynastyń negizgi baǵyttaryn qarastyrý, óńirlik jáne halyqaralyq máseleler boıynsha pikir almasý úshin tıimdi alań qyzmetin atqaryp keledi.
Bul jolǵy kezdesýdiń mańyzdy qorytyndysy Qazaqstannyń Eńbek jáne halyqty áleýmettik qorǵaý mınıstrligi men Ulybrıtanııanyń GLAA agenttigi arasynda yntymaqtastyq týraly memorandýmǵa qol qoıylýy boldy. О́ıtkeni qujat Ulybrıtanııada ýaqytsha jumys isteıtin Qazaqstan azamattarynyń eńbek quqyn qorǵaý, sondaı-aq aqparat, tájirıbe jáne eńbek quqyn qorǵaý salasyndaǵy ozyq tájirıbelermen almasý maqsatynda eki eldiń tıisti vedomstvolary arasyndaǵy yntymaqtastyqty nyǵaıtýǵa baǵyttalǵan.
Londonǵa sapary aıasynda R.Vasılenko Ulybrıtanııa Parlamenti Qaýymdar palatasy tóraǵasynyń birinshi orynbasary Nýsrat Ganımen kezdesip, eki el arasyndaǵy parlamentaralyq dıalogti damytý keleshegin talqylady. Sondaı-aq ol Halyqaralyq strategııalyq zertteýler ınstıtýty sııaqty brıtandyq saraptamalyq qaýymdastyq ókilderimen birqatar jumys kezdesýin ótkizdi.