Atyraý qalasynda para alǵan polısııa qyzmetkeri sottaldy. Ol 300 myń teńge kóleminde aqsha alyp, áriptesiniń júrgizip jatqan qylmystyq isine yqpal etemin dep ýáde bergen, dep habarlaıdy Egemen.kz.
Sottyń málimetinshe, aıyptalýshynyń kinási telefon arqyly sóılesken jazbalar, jábirlenýshiniń jáne kýágerlerdiń aıǵaqtary, sondaı-aq saraptama nátıjeleri arqyly dáleldengen.
«Prokýror sottan 6 jyl bas bostandyǵynan aıyrý, memlekettik qyzmette jumys isteý quqyǵynan ómir boıyna aıyrý jáne «leıtenant» ataǵynan aıyrý jazasyn taǵaıyndaýdy surady. Alaıda, aıyptalýshynyń qorǵaýshylary ony aqtaýdy talap etti», — delingen habarlamada.
Sottalýshynyń kámeletke tolmaǵan balalary bar ekenin eskere otyryp, biraq qyzmettik antyn buzýyn aýyrlatatyn jaǵdaı dep tanyp, oǵan 6 mıllıon teńge aıyppul saldy. Sonymen qatar memlekettik qyzmette jumys isteýge ómir boıyna tyıym salynyp, polısııa leıtenanty ataǵynan aıyryldy.