Azamattyq qoǵam atsalysýǵa daıyn

Keshe Astanada Demokratııalyq kúshterdiń «Qazaqstan-2050»  jalpyulttyq koalısııasynyń otyrysy ótti. Onda jetekshi saıası partııalardyń tóraǵalary, úkimettik emes uıymdar men azamattyq qoǵam ókilderi Prezıdent Nursultan Nazarbaev aıqyndaǵan «100 naqty qadam» Ult josparyn iske asyrýǵa atsalysý máselelerin talqylady. Jıyndy ashqan «Nur Otan» partııasy Tóraǵasynyń birinshi orynbasary, koalısııa tóraǵasy Baýyrjan Baıbek Memleket basshysy usynǵan reformalardyń mańyzdylyǵyna toqtala kelip: – Qazirgi reformalar – egemen el bolǵannan beri júzege asqan irgeli isterdiń zańdy jalǵasy. Memleket pen qoǵam damýynyń kelesi jarqyn kezeńine ótý aldynda qarqynymyzǵa qarqyn qosatyn, Qazaqstandy álemniń eń damyǵan 30 eliniń qataryna engizer naqty sharalar kesheni, – dedi. Onyń sózine qaraǵanda, mundaı keleli sharalardy azamattyq qoǵamnyń atsalysýynsyz júzege asyrý múmkin emes. Elbasy «demokratııalyq qoǵamnyń ajyramas bólshegi» dep ataǵan azamattyq qoǵam ınstıtýttaryna osynaý aýqymdy reformalardy iske asyrýda asa úlken jaýapkershilik artylady. Budan bólek, Baýyrjan Baıbek elimizdiń aldyna – «Barshaǵa ortaq qazirgi zamanǵy memleket», «Zańnyń ústemdigin qamtamasyz etý», «Turaqty ekonomıka», «Bolashaǵy birtutas ult», «Transparenttik jáne esepti memleket» sııaqty bes ınstıtýttyq reformany júrgizý boıynsha aýqymdy mindetter qoıylyp otyrǵanyn, 2015 jylǵy 20 mamyrda «Memlekettik qurylystyń aldaǵy 100 naqty qadamy» atty Ult jospary usynylǵanyn, bul qujat halyqaralyq sarapshylar tarapynan joǵary baǵalanǵanyn, olar Qazaqstannyń álemdegi eń bedeldi baǵdarlamalarynyń birinen bastaý alǵanyn atap kórsetkenin jetkizdi. Sondaı-aq, ol «Nur Otan» partııasynyń bes ınstıtýttyq reforma sheńberinde Ult jos­paryn júzege asyrý boıynsha usynystardyń aýqymdy paketi daıyndalǵanyn málim etti. Onyń aıtýynsha, bul usynystar ótken aptada «Nur Otan» partııasynyń qoǵamdyq saıasat ınstıtýty men Medıalyq tehnologııa­lar orta­lyǵy qurǵan «Sarap Time» saraptama klýby alańynda talqylanǵan. Buǵan qosa, B.Baıbek Ult jos­paryn júzege asyrýda túpkilikti kózdelip otyrǵan maqsatymyzdyń mánisin túsindire ketti. – Elbasy aıtqandaı, elde ádil sot pen quqyq qorǵaý júıe­sin, halyqqa qyzmet etetin mem­le­kettik apparat qurý, ekonomıkasy kemel, bolashaǵy birtutas ult bolýǵa baǵyttalǵan reforma­lardy júzege asyrý – qarapaıym qazaqstandyqtardyń qamy. Maq­sat – memleketke degen azamattar arasynda aınymas senim qalyp­tastyrý, sol arqyly Máńgilik El bolýdyń dańǵylyna túsý, – dedi. Sonymen qatar, basqosýda belgili bolǵandaı, «Nur Otan» partııasy qurǵan respýblıkalyq-qoǵamdyq shtabqa koalısııa músheleriniń 90 paıyzy kirgen. Bir aı ishinde olar kóptegen aýdandar men aýyldarda, 20-dan astam iri kásiporyndarda bolyp, 70 myńnan astam adammen kezdesken. Barlyq qoǵamdyq birlestikter elimizdiń órkendeýi úshin Elbasynyń janyna toptasyp, ózderiniń saıası mádenıetteriniń joǵary deńgeıin kórsete bilgen. Prezıdenttiń reformalary azamattardyń memleketke degen seniminiń arttyrylýyna, azamattyq bastamalar men qoǵamdyq baqylaýdy keńeıtýge baǵyttalǵan. Jıynda aıtylyp ótkendeı, Memleket basshysynyń tapsyrma­sy­na sáıkes, aýqymdy ákim­shilik reforma júrgizilip, saıası qyz­met­kerlerdiń sany 8 ese qysqarǵan. Ekonomıkany júıeli túrde damy­týdyń arqasynda óńirlerdiń múm­kindikteri aıtarlyqtaı ulǵaıǵan. Osylaısha, sońǵy 10 jylda jer­gilikti bıýdjetter 5 ese, orta­lyqtyń transfertteri 8 ese artqan. Basqosý barysynda Ulttyq ekonomıka mınıstri Erbolat Dosaev, Májilis depýtaty Nur­lan Ábdirov jáne jetekshi saıası partııalardyń tóraǵalary, úkimettik emes uıymdar men aza­mat­tyq qoǵam ókilderi, sarapshylar bes ınstıtýttyq reforma, «100 naqty qadam» Ult jospary jó­ninde oı-pikirlerin aıtyp, ózderin tolǵandyryp júrgen usynys­taryn jetkizdi. Otyrys sońynda Demo­kratııalyq kúshterdiń «Qazaq­stan-2050» jalpyulttyq koalısııasy «100 naqty qadam» Ult josparyn júzege asyrýǵa qatysty Úndeý qabyldady. Joldybaı BAZAR, «Egemen Qazaqstan».