Premer-mınıstr Oljas Bektenov salalyq mınıstrlikter men memlekettik uıymdar basshylyǵynyń qatysýymen Kólik jáne logıstıkalyq ınfraqurylymyn damytý máseleleri jónindegi otandyq kásipkerler keńesiniń otyrysyn ótkizdi, dep jazady Egemen.kz.
Taraptar saladaǵy ózekti máselelerdi sarapqa saldy. Bıznes ókilderi jeke ınvestısııalardy engizýdegi jáne saladaǵy jańa ınfraqurylymdyq jobalardy iske asyrýdaǵy ákimshilik kedergilerdi málimdedi. Elimizdegi bıznes-ahýaldy jaqsartý úshin retteýshi normalardy jetildirýge qatysty usynystaryn aıtty.
«Konkýrent-B» JShS bas dırektory Baqytbek Qadyrov temirjol salasyna jeke ınvestısııalardy tartyp, ekonomıkalyq ósý áleýeti bar óńirlerde jańa joldar salýdy usyndy.
Premer-mınıstr temirjol qurylysyna jeke ınvestısııalarǵa qatysty bastamany qoldap, Kólik mınıstrligine bıylǵy 1 naýryzǵa deıin ınvestısııalardy qaıtarý tetigi boıynsha naqty usynystar engizýdi tapsyrdy.
«Sary-Arqa» halyqaralyq áýejaıy» AQ bas dırektory Erlan Ospanov shaǵyn avıasııa ınfraqurylymy úshin áýe habtaryn damytý týraly bastama kóterdi. Áýejaılardy júıeli damytý, olardyń ekonomıkalyq turaqtylyǵyn arttyratynyna basa nazar aýdaryldy. Premer-mınıstr bastamalarǵa qoldaý bildirip, áýejaılardyń jumysy úshin básekege qabiletti jaǵdaı jasaýdyń mańyzdylyǵyn atap ótti. Atalǵan máselege qatysty egjeı-tegjeıli pysyqtaý jáne sheshim qabyldaý úshin qosymsha kezdesýler ótkiziledi.
Osy kezdesý qorytyndysy boıynsha Oljas Bektenov kólik ınfraqurylymyn damytý memleket pen bıznestiń belsendi ózara is-qımylyn qajet etetinin basa aıtty. Memlekettik bıýdjet salanyń barlyq qajettiligin óteı almaıtynyn, jeke ınvestısııalar tartýǵa basymdyq beriletinin atap ótti.