Qorǵaljyn tabıǵı qoryǵyna aparatyn «Astana – Qorǵaljyn» avtojolynda jóndeý jumystary bastaldy. Bul týraly Kólik mınıstri Marat Qarabaev Aqmola jáne Qostanaı óńirlerine jasaǵan jumys sapary aıasynda málimdedi, dep habarlaıdy Egemen.kz.
Joldyń ortasha jóndeýi byltyrdan bastalyp, Aqmol aýylynan Orazaq aýylyna deıingi 39 shaqyrymdyq joldy qamtyǵan. Bıyl osy jóndeý jumystarynyń alǵashqy kezeńi aıaqtalady.
«Endigi kezekte, bıyl Orazaq aýylynan Qorǵaljyn qoryǵyna deıingi 110 shaqyrymdyq jol ýchaskesinde ortasha jóndeý jumystary bastalady. Qorǵaljyn aýylynan qoryqqa deıingi jol ýchaskesi erekshe nazarda. О́tken ǵasyrdyń 60-jyldarynda salynǵan bul jol búginde asfaltobeton jamylǵysy joq topyraq tóseminen turady. Joldyń jańartylýy týrıstik aǵyndy arttyryp, óńirdegi shaǵyn jáne orta bıznestiń damýyna oń áser etedi dep kútiledi», delingen habarlamada.
Aıta keteıik, jol jóndeý jumystary oblysaralyq jáne aýdanaralyq kúre joldardy aýqymdy ortasha jóndeý aıasynda júzege asyrylyp jatyr. Prezıdent tapsyrmasyna sáıkes, jalpy jóndeletin joldardyń kórsetkishi 10 myń shaqyrymǵa deıin artady. 2025 jyly 8 myń shaqyrym respýblıkalyq mańyzy bar jol jóndelse, 2026 jyly 2 myńnan astam jol jańartylmaq.