Qazaqstan Respýblıkasy Qorǵanys mınıstrliginiń áskerı ınstıtýttarynyń 50-den astam túlegi general ataǵyna ıe boldy. Bul týraly Áskerı bilim jáne ǵylym departamentiniń bastyǵy Murat Qýatbekuly aıtty, dep habarlaıdy Egemen.kz.
Qazaqstan Respýblıkasy Qorǵanys mınıstrliginiń áskerı ınstıtýttary el táýelsizdigi jyldary ishinde 35 myńnan astam ofıserdi, 4 myń serjantty (kadettik korpýstan) jáne 14 myń «Jas ulan» respýblıkalyq mektepteriniń tárbıelenýshisin daıarlady.
Sonymen qatar, 50-den astam túlek general áskerı ataǵyna ıe boldy, bul áskerı oqý oryndaryndaǵy bilim berý sapasynyń joǵary ekenin jáne kadrlardyń kásibı ósip-jetilgenin dáleldeıdi.
Qazirgi ýaqytta Qazaqstannyń áskerı oqý oryndarynyń túlekteriniń shamamen 60%-y Qarýly Kúshter qatarynda qyzmetin jalǵastyrýda.
«Áskerı mamandardyń joǵary deńgeıdegi daıyndyǵy áskerdiń jaýyngerlik daıarlyǵyn, mobılızasııalyq óristeýin jáne eldiń qorǵanys qabiletin tıimdi qamtamasyz etýge múmkindik beredi. Áskerı bilim berýdi damytý aıasynda mamandyqtar spektri keńeıtilip, bul shetelde áskerı kadrlardy daıarlaýdy edáýir qysqartýǵa yqpal etti», delingen habarlamada.
Otandyq joǵary oqý oryndaryndaǵy oqý úderisi Qarýly Kúshterdiń qazirgi zamanǵy talaptaryna saı júrgizilýde, al elde joq biregeı mamandyqtar boıynsha daıarlaý halyqaralyq deńgeıde jalǵasýda.
Qazaqstannyń áskerı bilim berý júıesi dástúrlerdi saqtaı otyryp, zaman talabyna saı jańǵyryp, Qarýly Kúshterdi joǵary bilikti kadrlarmen qamtamasyz etýde.