Almatyda osyndaı ataýmen «Taza Qazaqstan» respýblıkalyq baǵdarlamasy aıasynda keń aýqymdy ekologııalyq naýqan ótedi, dep habarlaıdy Egemen.kz.
Naýryz aıynyń alǵashqy onkúndigi «Taza kósheler» degen ataýmen ótip jatyr. Bul kezeńde jol jabynyn, qoǵamdyq kólik aıaldamalaryn tazalaý, jol belgilerin jýyp-shaıý, qosymsha qoqys jáshikterin ornatý jáne qalanyń negizgi kóshelerin kórkeıtý jumystary júrgiziledi.
Naýqan barysynda jumysshylar Soltústik aınalma jolynyń boıyn tazartyp jatyr. Jumysshy Asqar Aldabergenovtiń aıtýynsha, jumys Rysqulov kóshesinen bastalyp, Aınabulaq shaǵyn aýdanyna qaraı jalǵasady.
«Qyzmetkerler qys kezinde jolǵa sebilgen qum men basqa da qoqystardy jınap jatyr. Bizdiń qolymyzda frontaldy tıegish, samosval jáne shańsorǵysh kólik bar. Jumysshylar negizgi qoqysty jınaǵannan keıin shańsorǵysh usaq qaldyqtardy tazalaıdy. Men osy salada 15 jyldan beri jumys isteımin. Qys bitkesin qar astynda qalǵan qaldyqtardy jınaımyz, al kóktemde saıabaqtar men gúlzarlardy retke keltiremiz. Jyl mezgilderine qaraı tazalyq jumystaryn júıeli túrde júrgizemiz», deıdi ol.
«Taza kósheler» naýqanyna 180 jumysshy jáne 60 birlik arnaıy tehnıka jumyldyrylǵan. Magıstraldyq kósheler ǵana emes, olarǵa irgeles jatqan saıabaqtar, gúlzarlar, aryq júıeleri tazartylyp jatyr. Aýlalarda «Qasbetten qasbetke deıin» qaǵıdaty boıynsha tazalyq jumystary qolǵa alynǵan.
Ákimdik kóriktendirý tólqujaty da engizilip jatqanyn habarlap otyr. Aýdan ákimdigi qyzmetkerleri kásipkerler men menshik ıelerin aralap, kóriktendirý tólqujatyna qol qoıýdyń myńyzyn túsindirý jumysyn bastaǵan. Bul aımaǵyn taza ustaýǵa degen jaýapkershilikti arttyrady.
Joldy shuńqyrly jóndeý jumystary da qolǵa alynǵan. Oıyqty, shuńqyrdy qalpyna keltirý, apatty jaǵdaıdaǵy aryqtar men jıektastardy aýystyrý jumystary bastalǵan.
1 naýryzdan 1 sáýirge deıin 4 kezeńge bólingen «Almaty – bizdiń ortaq úıimiz» naýqany myna jumystardy qamtıdy:
«Taza kósheler» (1-9 naýryz) – aıaldamalar men jol belgilerin jýý, qoqys jáshikterin ornatý, magıstraldy kóshelerdi kórkeıtý.«Taza saıabaqtar, skverler jáne taýlar» (10-16 naýryz) – tabıǵı aımaqtarda senbilikter ótkizý, qoqys jınaý sharalary.«Taza aýlalar» (17-23 naýryz) – aýlalardy, balalar jáne sport alańdaryn tazalaý, boıaý, kógaldandyrý, «Úzdik aýla/aýla sypyrýshysy/gúlzar» baıqaýlary.«Bizdiń qala – bizdiń maqtanyshymyz» (24 naýryz – 1 sáýir) – eskertkishterdi kórkeıtý jáne jappaı aǵash otyrǵyzý.