О́skemende Halyqaralyq áıelder kúni qarsańynda «Ǵasyrlyq dástúrler» atty kilem toqýshy sheberlerdiń arasynda respýblıkalyq baıqaý bastalyp jatyr. Kilem toqý – qazaq halqynyń eń kóne qolóneriniń biri. Osynaý ata dástúrdi jańǵyrtý maqsatyndaǵy sharaǵa elimizdiń kil myqty qolóner sheberleri jınalady.
Bul is-sharany ótkizý jolynda oblystyń burynǵy ákimi, búginde Premer-mınıstrdiń orynbasary Ermek Kósherbaev úlken ról atqardy deıdi uıymdastyrýshylar. Aıta ketsek, Shyǵys Qazaqstan sáýlet-etnografııalyq jáne tabıǵı-landshafttyq mýzeı-qoryǵynda 352 biregeı kilem buıymdary saqtalǵan. Bul jádigerler mýzeı zertteýshileri uıymdastyrǵan kópjyldyq etnografııalyq ekspedısııalar kezinde jınalǵan. Kilem toqý dástúri ásirese, Katonqaraǵaı, Tarbaǵataı jáne Ulan aýdandarynda damyǵan.
– Festıval halyqtyq kilem toqý dástúrlerin nasıhattaý jáne sándik-qoldanbaly óner sheberlerin qoldaý maqsatynda ótkiziledi. Shyǵarmashylyq ıdeıalardy talqylaý jáne tájirıbe almasý úshin art-alań qurylady. Bylaısha aıtqanda, ulttyq ónerimizdi zamanǵa saı yńǵaılap, saýdaǵa shyǵarýdy da kózdep otyrmyz. Onyń túpki maqsaty Shyǵystaǵy týrızm áleýetin nyǵaıtý, – deıdi Shyǵys Qazaqstan Qolónershiler resýrstyq ortalyǵynyń jetekshisi Raısa Muhamedjanova.
Saltymyzdy kórsetetin bul baıqaýda kórermenderdiń nazaryna ǵajaıyp kilemder, kıizden jasalǵan buıymdar, gobelender jáne sándik-qoldanbaly ónerdiń basqa da úlgileri usynylady. Sonymen qatar qolónershiler óz buıymdaryn, jabdyqtary men materıaldaryn kórsetip, oqytý sheberlik dáristerin ótkizedi. «Ǵasyrlyq dástúrler» festıvali – jaı ǵana festıval emes, bolashaq urpaqqa baǵa jetpes mádenı murany amanattaý múmkindigi.
Shyǵys Qazaqstan oblysy