Jaıqalǵan jasyl kóshetter áýelide, balǵyn kúıinde ydysqa otyrǵyzylyp, tamyrlanǵansha kútip-baptalady. Mundaı jumysqa qazir ormanshylar ǵana emes, mektep oqýshylary da tartylyp júr. Bul da bolsa – «Taza Qazaqstan» jalpyhalyqtyq aksııasy aıasynda atqarylyp jatqan ıgilikti sharanyń biri.
Jaqynda Katonqaraǵaı mektepteriniń oqýshylary ormanshylarmen birlesip, ydysqa Sibir shyrshasynyń tuqymyn ekti. Oqýshylar áýeli aǵa býynnyń nusqaýymen shyrsha tuqymy búrshikterden alyp, arnaıy eritindimen óńdedi, eń sapaly degenderin iriktep aldy. Sodan keıin baryp, ózderiniń esimi jazylǵan konteınerlerge otyrǵyzdy. Sharýa munymen aıaqtalmaıdy. Aldaǵy ýaqytta óskinderdi Katonqaraǵaı ulttyq parkiniń tuqym baǵyna otyrǵyzyp, ınspektorlarmen birge kútim jasaıdy. Kóshetter ósip-jetilgen soń árkim óz kóshetin mektep aýmaǵyna kóshiredi.
Jalpy, 2025 jyldyń basynan beri mektep ormanshylyqtarynda 600-ge jýyq tuqym otyrǵyzyldy. Jyl sońyna deıin 1000 tuqym egý mejelengen. Kóktem shyǵa oqýshylar aksııa aıasynda tuqymnan bólek, 4000 dana sibir shyrshasyn otyrǵyzýdy josparlap otyr.
– Katonqaraǵaı ulttyq parkinde barlyǵy 10 mektep ormanshylyǵy bar. Mektep ormanshylyqtary óskeleń urpaqtyń ekologııalyq mádenıetin qalyptastyrý, tabıǵı murany saqtaý, oqýshylardy qorshaǵan ortany qorǵaýǵa shaqyrý maqsatynda qurylǵan. Munda oqýshylar tabıǵat týraly teorııalyq bilim alyp qana qoımaı, tájirıbe jaǵyn da meńgeredi, – deıdi ormandy qalpyna keltirý ınjeneri Gúljaz Amanbaeva.
Mektep ormanshylyqtary tabıǵatty qorǵaý haqynda tárbıe berýmen qatar aýmaqtardy kógaldandyrý, ormandardy qalpyna keltirý, jergilikti turǵyndar arasynda ekologııalyq qundylyqtardy nasıhattaýda da úlken jumys atqarady. Bul aksııa ásirese jahandyq ekologııalyq syn-qaterler dáýirinde asa mańyzdy.
Shyǵys Qazaqstan oblysy,
Katonqaraǵaı aýdany