Batys Qazaqstan oblysynyń Aqjaıyq aýdanyna qarasty Taıpaq aýylynda isker áıelder forýmy ótti, dep habarlaıdy Egemen.kz.
«Áıel jáne bıznes. Jańa múmkindikter» degen taqyryppen ótken forýmǵa qatysýshylar áýeli Taıpaq aýylyndaǵy jún óńdeý sehynyń jumysymen tanysty. Aqjaıyq aýdandyq isker áıelder keńesiniń tóraıymy Lázzat Seıitkereeva jetekshilik etetin sehtyń ashylǵanyna kóp ýaqyt ótken joq. Biraq ataǵy aýdan-oblys asyp, respýblıkaǵa tanyldy. Taıpaq sheberleriniń qolynan shyqqan ónimder sońǵy eki jylda birneshe halyqaralyq kórmege qatysyp, Ulybrıtanııa, Germanııa, Italııa, t.b. shet elderge jol tartty. Japonııadan Akıhısa Karagýchı atty dárisker arnaıy kelip, jún ónimderin daıyndaý boıynsha qundy keńes berdi. Áý basta seh ismerleri júndi jýý, tazartý, tútý, basý syndy jumysty qolmen atqaratyn. Búginde bul istiń bári avtomattandyrylǵan. Jýyrda Lázzat Muratqyzy «Aýyl amanaty» jobasymen jeńildetilgen nesıe alyp, Reseıden qajet tehnıkany aldyrtypty. Qazir bul sehtan sývenırlik buıymdar, aıaq kıim, bas kıim, kórpe, sómke shyǵarylyp, júndi tútý, jýý qyzmeti kórsetiledi.
Seh jumysymen tanysqan soń forýmǵa qatysqan qyz-kelinshekter memlekettik baǵdarlamalar arqyly kásip bastaý, bıznesti óristetý boıynsha sheberlik dáristerin tyńdady.
Is-shara aıasynda aýdan ismerleriniń qolóner kórmesi uıymdastyryldy.
«Bolashaǵyn adal eńbekpen kórkeıtkisi keletin názik jandy kásipkerlerdiń bastamasyn, ynta-yqylasyn biz únemi qoldaımyz. Aýdanymyzdyń áleýmettik-ekonomıkalyq tynys-tirliginde aıshyqty iz qaldyrǵan aldyńǵy býyn ókilderiniń eńbegi de asa baǵaly. Búgingi dáýir – qolynan is keletin, alǵyr, sheber jáne jumysyna adal, eńbekqor, básekelestikke qabiletti jandardyń zamany. Bıylǵy Jumysshy mamandyqtar jylynda olardyń eńbegi laıyqty baǵalanýy tıis», dep atap ótti Aqjaıyq aýdanynyń ákimi Murat Serdalın.
Forým kezinde qolóner sheberi, zeınetker Sáýle Nurǵalıeva kásiptiń jas talǵamaıtynyn, egde tartqan shaqta da tabysqa jetýge bolatynyn óz mysalymen aıtyp berdi. Ol ótken jyly Dúnıejúzilik kóshpendiler oıyndarynda Astana qalasynda 11 200 sharshy metr alańǵa jaıylǵan 450 kórpeni quraǵan qolóner sheberleriniń biri. Esimi KINES rekordtar kitabyna engen Sáýle apaı qazaq ulttyq qolóneriniń ashylmaı jatqan áleýeti áli kóp ekenin aıtady.
«Bizdiń elde áıel-anaǵa barlyq múmkindik bar. «Otbasy, oshaq qasy» degen sóz burynǵyniki, qazirgi áıel – úıdiń de, túzdiń de adamy. Bala ósirý, otbasynyń qamymen qatar bizge elimizdi órkendetý mıssııasy erlermen teń júktelgen. О́kinishke qaraı, qoǵamda qazir masyldyq, memleketke alaqan jaıý basym. Sondyqtan isker áıelder jumylyp, tirlikti túletkiń kelse, tek óz eńbegińe kúsh-jigerińe súıený qajettigin kórseteıik», dedi tanymal telejúrgizýshi, kásipker Gúlnaz Álimgereı. Ol qazir Oral qalasynan «Taspa-LAB» stýdııasyn ashyp, qazaqy salt-dástúrdi nasıhattap júr. Bir ǵajaby, «Taspa-LAB» stýdııasy jergilikti ismerlerdiń qolynan shyqqan buıymdarmen árlengen.
Al aqbulaqtyq Qarlyǵa Moldaǵalıeva «aýylda jumys joq» degen pikirmen kelispeıtinin aıtyp, jurttyń qalaǵa údere kóshýine alańdaıtynyn aıtady. Onyń pikirinshe bul kóshti toqtatýdyń birden-bir sheshimi – aýylda óndiris oryndaryn ashý. Al mundaı kásipkerlik nysandaryn isker áıelder de ashsa, nur ústine nur.