Grýzııanyń burynǵy prezıdenti Mıhaıl Saakashvılıge qatysty taǵy bir sot úkimi shyqty. Ol memlekettik qarajatty iri kólemde talan-tarajǵa saldy degen aıyppen 9 jylǵa sottaldy, dep habarlaıdy Egemen.kz.
Sýdıa Badrı Kochlamazashvılı eks-prezıdentti bıýdjet qarajatyn zańsyz jumsady dep tanyp, ony bas bostandyǵynan aıyrý týraly sheshim shyǵarǵan.
Sonymen qatar, bul iste Grýzııanyń arnaıy kúzet qyzmetiniń burynǵy basshysy Teımýraz Djanashııaǵa qyzmettik ókilettigin asyra paıdalandy degen aıyp taǵylyp, 300 myń ları (shamamen 110 myń dollar) kóleminde aıyppul salynǵan.
Saakashvılıge taǵylǵan bul aıyp «Pıdjaktar isi» dep atalyp ketken. Tergeý málimetteri boıynsha, ol 2009-2013 jyldar aralyǵynda memlekettik bıýdjetten 8,8 mıllıon ları (shamamen 3 mıllıon dollar) jeke shyǵyndaryna jumsaǵan. Bul qarajattyń bir bóligi Londonda qymbat brendtik kıimder satyp alýǵa, onyń ishinde jeti pıdjak pen kashemır palto alýǵa, sondaı-aq sheteldegi demalystar men kosmetıkalyq prosedýralarǵa ketken.
Alaıda, Saakashvılı men Djanashııa taǵylǵan aıyptardy moıyndamaı, bul sot isiniń saıası astary bar dep aıtqan.
Aıta keteıik, eks-prezıdent qazirdiń ózinde basqa qylmystyq ister boıynsha 6 jyldyq jazasyn ótep jatyr. Oǵan Sandro Gırgvlıanıdiń óltirýshilerin zańsyz keshirdi jáne depýtat Valerı Gelashvılıge shabýyl uıymdastyrýǵa buıryq berdi degen aıyp taǵylǵan.
Saakashvılıdiń jaqtastary bul isterdi saıası qýdalaý dep esepteıdi, al Grýzııa bıligi eks-prezıdenttiń qylmystyq áreketteri úshin jaýap berýi tıis ekenin alǵa tartqan.