Bıyl óńirdegi birneshe jol jóndeledi. «Qaraǵandy – Jezqazǵan» baǵytyndaǵy kúrejoldyń qurylysy bastalady. Salynar joldyń sapaly bolýy – negizgi talap. Sol sebepti Jol aktıvteri ulttyq sapa ortalyǵynyń jumysy qarbalas kúı keship keledi. Ásirese kompanııanyń zerthana qyzmetkerleri tańnyń atysy, kúnniń batysy damylsyz júrip qyzmet atqarady.
Jol salasynyń sapasyn qadaǵalaýǵa jaýapty birden-bir mekeme – Jol aktıvteriniń ulttyq sapa ortalyǵy. Jaýapty mekemeniń negizgi mindetine jol salý, rekonstrýksııalaý, jóndeý, kútip ustaý jumysyn qadaǵalaý kiredi. Iаǵnı salynar joldyń qatparyna, tóselip jatqan jol qabatyna saraptama jasaıdy. Ár óńirde fılıaly bar mekemedegi ınspektorlar jyl saıyn 17 myń shaqyrymnan astam halyqaralyq, respýblıkalyq, oblystyq mańyzy bar joldarǵa dıagnostıka júrgizedi. Jol-qurylys materıaldaryna 220 túrli jan-jaqty zerthanalyq zertteý jasalady. Ortalyqtyń osynshama syn tezinen sátti ótip, támamdalǵan sapaly jol álbette, sapar júgin jeńildetedi.
Sol sebepti qurylysqa qajetti materıal da, tájirıbeli maman da – jolǵa kepil. Jol aktıvteri ulttyq sapa ortalyǵynyń Qaraǵandy oblysyndaǵy fılıalynyń jol ınjeneri Ásel Hasenova – jyljymaly jol zerthanasy arqyly óńirdegi jol salasyna eleýli úles qosyp júrgen maman.
Jyljymaly zerthanada joldy tekserýge qajettiniń bári bar: jol datchıgi, geometrııalyq parametrlerdi ólsheý júıesi, tegistikti, kóldeneń tegistikti ólsheýge arnalǵan júıe, beınejazba, GPS, munymen qosa aqaýlardyń syzyqtyq ólshemderine deıin ólsheıtin qurylǵy. Munshama tehnologııanyń tilin tereń túsingen biregeı ınjener – ujymynda bedeldi maman.
Jalpy, jol qurylysy salasynda maman tapshylyǵy degen másele óte ózekti bolyp otyr. Jol salyp jatqan merdiger kompanııalarda zerthana meńgerýshileri men jol-qurylys materıaldarynyń ınjenerleri jetispeıdi. Munymen qosa asfalt tóseýshi, jol tegisteıtin tehnıka, býldozer men avtogreıder operatorlary tapshy. Bilikti mehanızatorlar, geodezııa, kartograf mamandar, meteorologter men mehanıkterdiń joqtyǵy jumys qarqynyn tejeıdi. Sol turǵyda ortalyqtyń qyzmetkerleri bos jumys orny jármeńkelerin qalt jibermeı, qatysady. Kolledj, ýnıversıtet túlekterimen kezdesip jastardy jumysqa tartady. Jol salasyna qyzyǵyp kelgenderdi Ásel sekildi jetekshi ınjener qýana qarsy alyp, bilgenimen bólisip, tehnologııanyń túrli tásilin úıretedi. Sóıtip, saladaǵy bilikti maman sany jyl ótken saıyn kóbeıip keledi.
Jetekshi sarapshy Ásel qazirgi qyzmetine deıin túrli salada qyzmet atqardy. Almatydaǵy Halyq sharýashylyǵy ýnıversıtetin qarjyger mamandyǵy boıynsha úzdik dıplommen támamdady. Sodan óziniń ómirlik jaryn jolyqtyryp, Qaraǵandyǵa qonys aýdardy. Qalalyq tergeý ızolıatorynyń esep bólimine jumysqa ornalasty. Osynda qyzmet ete júrip basqa jumysqa aýysýdy oılastyrady. Sol kezde qaıyn atasy Qarajal qalasyndaǵy jolǵa jaýapty mekemeni basqaratyn edi. Atasy aqyl salyp, nusqaý kórsetken soń «Qazavtojol» mekemesine jumysqa turdy. Osy kezden jol qurylysy salasy baýrady. Eńbek ete júrip, jol ınjeneri, zańger mamandyǵyn oqyp aldy. Qazir qos dıplomy, alǵan bilimi ózine úlken kómek. Biliktilikti arttyratyn kýrstardan da qalmaıdy. О́ıtkeni tehnologııa aı saıyn jańaryp, jańǵyryp otyrady.
Jol ınjeneri salamatty ómir saltyn berik ustanady. Sporttyń túr-túrinen habary bar. Jyl saıyn ortalyqtyń barlyq óńirdegi fılıal qyzmetkerleri arasynda túrli sporttyq saıys uıymdastyrylady. Sonyń bárine belsendi qatysyp, óńirdegi qosynnyń qorjynyn júldege toltyryp júr. Voleıbol, tennıs sekildi dodalar, doıby sekildi taqtadaǵy tartysta da aldyna jan salmaıtyn qabileti bar.
Ásel – aıaýly jar, kelisti kelin, asyl ana. Shańyraǵyna shýaq shashyp otyrǵan onyń kóziniń aǵy men qarasyndaı bolǵan qos qulyny bar. Otaǵasy jeke kásippen aınalysady. Otbasyndaǵylar bilikti jol qurylys ınjenerine úlken qoldaý kórsetedi. Jetistikterimen maqtanady, marqaıady. Bilikti ınjenerdiń jol salasyna sińirip júrgen eńbegi eren.
Qaraǵandy oblysy