Prezıdent Kókshe tórindegi quryltaıda osydan úsh jyl buryn naýryz aıynda jarııalaǵan Joldaýyna saı júrgizilgen qoǵamdyq-saıası reformalarǵa toqtalyp, el ishindegi oń ózgeristerge Ulttyq quryltaı músheleri de orasan zor úles qosqanyn atap ótti, dep habarlaıdy Egemen.kz.
Memleket basshysy, eń aldymen, qoǵamda qyzý talqylanyp jatqan salyq reformasyna qatysty pikir bildirdi.
«Salyq júıesi, bul – búkil memlekettik júıeniń tiregi. Bıýdjette qarjy bolmasa, memleket óz mindetin tolyq atqara almaıdy, áleýmettik mindettemeler de oryndalmaıdy. Elimiz úshin asa qajet sharalardyń mán-mańyzyn halyqqa egjeı-tegjeıli túsindirý kerek. Jurttyń bári ekonomıst nemese qarjyger emes. Memlekettiń qandaı sharany ne úshin qolǵa alyp jatqanyn bári birdeı túsine bermeýi múmkin. Sondyqtan reformanyń mánin ár adamǵa túsinikti tilmen jetkizý kerek. Úkimet salyq reformasyna qatysty jańa tásilderdi usyndy. Bul sharalar, jalpy alǵanda, durys. Onda negizgi ekonomıkalyq jáne áleýmettik faktorlar eskerilgen. Kásibı mamandar da, jalpy jurtshylyq ta qosymsha qun salyǵynyń mólsherlemesin kóterý qajettigine túsinistikpen qaraıdy. Degenmen usynylǵan sharalarǵa, sonyń ishinde, qosymsha qun salyǵyna qatysty syn-pikirler de estilip qalady. Biraq mundaı paıym shynaıy ahýalǵa negizdelmegen. Túrli sebepke baılanysty ózine aýqymdy áleýmettik mindetteme almaıtyn elder az emes. Al Qazaqstannyń bıýdjet qarjysynyń jartysynan kóbi áleýmettik salanyń enshisinde. Bizdiń elimiz – áleýmettik memleket. Sondyqtan bilim berý, densaýlyq saqtaý salalaryna ınvestısııa salýdy jalǵastyramyz», dedi Prezıdent.
Budan bólek, Qasym-Jomart Toqaev Ulttyq quryltaı músheleri tarapynan kóterilgen qoǵamdyq ádepti retteý; teris aǵymdar men ulttyq bolmysymyzǵa jat ıdeologııalarǵa, túrli alaıaqtyq áreketterge tosqaýyl qoıý; otandyq kıno jáne anımasııa óndirisine ıdeologııalyq turǵydan mán berý; áıelder kolonııasyndaǵy jaǵdaıdy túzep, qylmystyq-atqarý júıesindegi zańnamanyń júkti nemese kámelet jasqa tolmaǵan balalary bar áıelderge qatysty tusyn qaıta qaraý, kásiptik- tehnıkalyq kolledjderdi damytý isinde jańa mamandyqtarǵa suranys pen eńbek naryǵyndaǵy jaǵdaıdy eskerý sekildi ózekti máselelerge qoldaý bildirip, óz oıyn ortaǵa saldy.
Memleket basshysy onomastıka salasyn, memlekettik jáne mekemelik marapattar júıesin jetildirý, jasampazdyq qundylyqtardy dáripteý, áleýmettik keselderdi joıý, azamattyq qoǵamdy damytý baǵytynda atqarylyp jatqan jumystyń kemshin tustaryna nazar aýdaryp, ishki saıasattaǵy aýqymdy ıdeologııalyq jumysty júıeleıtin birtutas tujyrymdamalyq qujat ázirleýdi tapsyrdy.
Sonymen qatar Prezıdent ulttyq biregeıligimizdi nyǵaıtý jolynda mádenıet salasy aıryqsha ról atqaratynyn aıtty. Qasym-Jomart Toqaev elimizde teatr ónerine degen qyzyǵýshylyq ósip kele jatqanyn alǵa tartyp, óńirlerdegi teatrlardy damytýǵa ári bul iske bıznes ókilderin belsendi atsalysýǵa shaqyrdy. Sondaı-aq Abaı Qunanbaılynyń 180 jyldyq mereıtoıy qarsańynda Abaı ınstıtýtyn Konfýsıı, Gete, Servantes ınstıtýttary sııaqty halyqaralyq deńgeıdegi mádenı-aǵartý mekemesine aınaldyrý úshin Syrtqy ister mınıstrligi men «Otandastar» qoryna Mádenıet jáne aqparat mınıstrligimen birlesip, shetelde osyndaı ortalyqtar ashý boıynsha tıisti jumysty jalǵastyrýdy tapsyrdy.
Budan bólek, Prezıdent Halyqaralyq «Qazaq tili» qoǵamynyń bastamalaryn qoldaý, qujat túrindegi muralarymyzdy IýNESKO-nyń «Álem jady» tizimine engizý, tól bolmysymyz ben mádenıetimizdi aıshyqtaıtyn ulttyq sıfrlyq muraǵatty jasandy ıntellekt júıelerine kiriktirý, tarıhı zertteýlerdi jandandyrý mindetterin aıqyndady.
Qasym-Jomart Toqaevtyń jurtshylyq aldyndaǵy sóziniń bir bóligi elimizde júzege asyrylyp jatqan iri ınvestısııalyq jáne ınfraqurylymdyq jobalarǵa arnaldy.
Prezıdenttiń aıtýynsha, memlekettiń eń basty mindeti – aımaqtardyń ekonomıkalyq ósimine túrtki bolatyn jáne óńirlerdiń damýyndaǵy teńsizdikti joıatyn bastamalarǵa basa mán berý. Bul rette bıyl ekonomıkanyń naqty sektoryn qarjylandyrý kólemi eki ese, ıaǵnı 8 trıllıon teńgege deıin ulǵaımaq. Prezıdent óńirlerdegi bilim berý, densaýlyq saqtaý, týrızm jáne sport salalaryn damytý jobalaryna keńinen toqtalyp, olardy ýaqtyly ári sapaly júzege asyrý mańyzdy ekenin eskertti.
«Qýatty aımaqtar – qýatty el» ustanymy – meniń saıası baǵdarymdaǵy myzǵymas qaǵıdanyń biri. Úkimet osy qaǵıdany negizge ala otyryp, oblystardyń enshisindegi áleýmettik salyqty saqtap qalý týraly sheshim qabyldady. Alaıda oblys ákimderi bıýdjet qarjysyn únemdep, tıimdi paıdalanýy kerek. Elge paıdasy tıetin áleýmettik mańyzy bar jobalarǵa basymdyq berý qajet. Búgin aıtylǵan bastamalar men jobalar aımaqtardyń birkelki damýyna yqpal etip, elimizdiń odan ári órkendeýine jol ashady dep senemin», dedi Memleket basshysy.
Qasym-Jomart Toqaev sózin qorytyndylaı kele, jahanda júrip jatqan úderisterge sholý jasap, Qazaqstandy kez kelgen syn-qaterge tótep bere alatyn qýatty memleketke aınaldyrýdyń qamy jóninde oı tolǵady.
Prezıdenttiń pikirinshe, elimiz táýelsizdiktiń 40 jyldyǵyna qandaı qandaı jetistikpen jetetinin, oǵan deıin qandaı tarıhı mindetterdiń oryndalýǵa tıis ekenin naqty bilý mańyzdy. Bul rette Memleket basshysy sıfrlandyrý men jasandy ıntellektini, energetıka, agroónerkásip sektoryn jáne adam kapıtalyn Qazaqstannyń jańa álemdegi ornyqty damýyna jol ashatyn negizgi faktorlary retinde atady.