Búgin Májilistiń jalpy otyrysynda depýtat N.Sársenǵalıev keıingi 6 jyldaǵy ana men bala óliminiń derekterine toqtalyp, salada saralanýy tıis kúrmeýli máselelerdi aıtyp, Úkimet basshysyna saýal joldady, dep jazady Egemen.kz.
Depýtat keltirgen derekke súıensek, 2019 jyly Qazaqstanda 3360 sábı shetinep ketken, 2020 jyly 3286 sábı, 2021 jyly 3732 bópe baqılyq bolǵan. 2022 jyly 3154 náreste, 2023 jyly 2998 sábı shetinep ketken. 2024 jyly 2598 sábı anasynyń qushaǵyna enbegen.
Sábı ólimi jıiligen aımaqtar qatarynda Abaı, Aqtóbe, Almaty, Jetisý, Ulytaý oblystary bar.
Bul taqyryp sóz bolǵanda ana ólimi taqyrybyna toqtalmaı ketýge bolmas. Resmı derek keıingi 6 jylda elimizde 563 ana bosaný ústinde kóz jumǵanyn aıǵaqtaıdy. Ana ólimi Jetisý, Qostanaı, Ulytaý men Aqtóbe oblystarynda kóbeıgen.
2024 jyldyń qorytyndysy boıynsha kóz jumǵan analardyń 54 % qalada, 46 % aýylda turǵan. 4 nemese odan da kóp balasy bar áıelder arasyndaǵy ólim-jitim de kóbeıip, saldarynan 97 bala jetim qalǵan.
«Salada problema jetkilikti, basqasyn bylaı qoıǵanda Astana qalasyndaǵy perzenthanalarda 550 tósek tapshy. Oǵan qosa maman jetkiliksiz. Elimizde 4 702 akýsher-gınekolog jumys isteıdi, taǵy 389 maman kerek. Bosandyrý uıymdarynda tek 1 679 akýsher – gınekolog jumys isteıdi, onyń 560-y ǵana (35%) ampýtasııa jasaı alady. Al akýsherııada operasııalyq tehnıkanyń barlyq túrlerin tek 438 dáriger ǵana (21%) oryndaı alady. Bul úlken problema», ekenin atap ótken N.Sársenǵalıev elimizdegi keı perzenthanalardyń halyqaralyq talaptarǵa saı kelmeıtinine de nazar aýdardy.
«Infraqurylymy nashar, ǵımarat ábden tozǵan. Máselen ortalyqtandyrylǵan ottegi jetkizgishi, Syǵylǵan aýa jáne sorý vakýýmy, qabyldaý bólimderi joq. 3-deńgeıdegi bosandyrý uıymdarynda ekspress bak joq. Flora men antıbıotıkterge sezimtaldyqty ýaqtyly anyqtaýǵa arnalǵan zerthanalar joq. Budan bólek, medısınalyq jabdyqtardyń tozýy men medısınalyq mekemelerdiń tómen jaraqtandyrylýy da ózekti másele. Mysaly birneshe ortalyqta ÝDZ, KTG apparattary, anestezııa apparattary, QST analızatorlary, SMAD apparattary joq», dedi depýtat.
Ol osy máselelerdi sheshý úshin ana men bala densaýlyǵyna tikeleı jaýapty perınataldyq ortalyqtar men perzenthanalardaǵy dárigerlerdiń, sanıtarlardyń, tehnıkalyq mamandardyń aılyǵyn kóterý syndy birneshe usynysyn ortaǵa saldy.
«О́ńirlerge myqty dárigerlerdi tartý úshin bir rettik kótermeaqy men arnaıy turǵyn úı baǵdarlamasyn iske qosý qajet. Myqty mamandardy daıarlaý úshin balalar beıini boıynsha kafedralardy qalpyna keltirý kerek. Oblys ortalyǵynan shalǵaıdaǵy aýyldyq jerlerde jáne aýdandarda júktiligi aýyr ótip jatqan áıelderdi aldyn ala emdeýge arnalǵan pansıonattardy dereý salý kerek. Sebebi alystaǵy aýyldan tolǵaq qysqan anany ortalyqqa ákelgenshe túrli jaǵdaı oryn alýy múmkin. «Patronajdyq medbıke» laýazymyn engizý qajet. Perınataldyq ortalyqtar men perzenthanalardyń, balalar aýrýhanalarynyń materıaldyq-tehnıkalyq bazasyn jańartý kerek», dedi N.Sársenǵalıev.