Elordada áıelder densaýlyǵy, kontrasepsııa jáne qoǵamnyń áıelderdiń reprodýktıvti quqyqtary týraly habardarlyǵyn arttyrý máselelerine arnalǵan ashyq talqylaý ótti. Is-sharany Gedeon Richter Kazakhstan kompanııasy Kazakhstan Women’s Health jobasy aıasynda uıymdastyrdy.
Talqylaýdy QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Nazym Janǵazınova júrgizdi.
Kezdesýdiń basty maqsaty – qoǵam nazarynan tys qalyp júrgen taqyryptardy ashyq talqylaýǵa arnalǵan alań qurý. Joǵary sanatty akýsher-gınekolog, medısına ǵylymdarynyń doktory Aınur Tóletova keń taralǵan gınekologııalyq aýrýlar, jynystyq jolmen beriletin ınfeksııalar, zamanaýı kontrasepsııa ádisteri jáne jasóspirimderdiń jynystyq tárbıesiniń mańyzy týraly baıandady.
Talqylaý barysynda qazaqstandyqtar arasynda júrgizilgen saýalnama nátıjeleri de usynyldy. Zertteý kórsetkendeı, respondentterdiń 73%-y jedel kontrasepsııanyń bar ekendigin biledi, bul qoǵamda osy taqyryp boıynsha habardarlyqtyń birtindep artyp kele jatqanyn kórsetedi.
Alaıda, 43%-y jedel kontrasepsııa bedeýlikke ákelýi múmkin dep eseptese, 55%-y ony túsik jasatýmen teńestiredi.
Aınur Tóletova bul keń taraǵan qate pikirlerdi joqqa shyǵardy.
"Jedel kontrasepsııa preparattary urpaq órbitý qabiletine áser etpeıdi. Olardyń áser etý mehanızmi ýaqytsha jáne reprodýktıvti júıege zııan keltirmeıdi. Bul - ǵylymı dáleldengen fakt. Preparattar ovýlıasııany nemese uryqtanýdy boldyrmaıdy, biraq júkti bolǵan jaǵdaıdy úzbeıdi. Kontrasepsııa – bul densaýlyqqa qaýip emes, kerisinshe, kúrdeli jaǵdaılardyń aldyn alý múmkindigi", - dedi ol.
"Gedeon Rıhter Qazaqstan" kompanııasynyń ókili Dınara Birmaǵanbetova osyndaı is-sharalardyń mańyzdylyǵyn atap ótti.
"Áıelder densaýlyǵy taqyrybynyń ashyq talqylana bastaǵanyna qýanyshtymyz. Áıelder senimdi aqparatqa qol jetkizip, densaýlyǵyna qatysty sheshimderdi ýaqytyly qabyldaı alýy óte mańyzdy", - dedi kompanııa ókili.
Is-sharaǵa belgili qoǵam qaıratkerleri men medıa tulǵalar qatysty, olardyń ishinde telejúrgizýshi, jýrnalıst jáne medıamenedjer, «Maryam» qorynyń negizin qalaýshy Láılá Sultanqyzy jáne «Jaqsylyq klýby» qaıyrymdylyq qozǵalysynyń negizin qalaýshy Gúlmıra Abdrasheva bar. Olar túrli qıyn jaǵdaılarǵa tap bolǵan áıelderge kómek kórsetý tájirıbesimen bólisti.
Sonymen qatar, kezdesý barysynda Láılá Sultanqyzy, Gúlmıra Abdrasheva, Aınur Tóletova jáne Nazym Janǵazınova Kazakhstan Women’s Health jobasynyń ambassadorlary bolyp taǵaıyndaldy.
Is-sharaǵa jalpy sany 50-ge jýyq adam, sonyń ishinde jýrnalıster, qoǵam qaıratkerleri jáne depýtattar qatysty.