Astanada Mádenıet jáne aqparat mınıstrligi Din isteri komıtetiniń jáne «Azamattyq bastamalardy qoldaý ortalyǵynyń» qoldaýymen «Rýhanı jańǵyrý» qoǵamdyq qorynyń uıymdastyrýymen din máselerine qatysty bilikti mamandardy daıyndaýǵa baǵyttalǵan is-shara ótti, dep habarlaıdy Egemen.kz.
Is-sharaǵa Din zertteý ortalyǵynyń, meshitterdiń, orta jáne joǵary oqý oryndarynyń jáne t.b mamandary, ımamdary, psıhologtary men teologtary qatysty. Jıynda din máseleleri boıynsha túsindirý tobynyń músheleri – rıtorıka mamany Amanbek Tolqyn jáne psıhologııa mamany Shakımova Lola Sergeevna semınar oqydy.
Amanbek Tolqyn «Effektıvnaıa kommýnıkasııa. Konflıktologııa» taqyryby aıasynda qatysýshylarǵa tıimdi qarym-qatynas ornatý jáne konflıkttermen jumys isteý úshin paıdaly quraldardy usyndy. Sondaı-aq, dáris taqyrybyna sáıkes praktıkalyq jaǵdaılar men ómirlik mysaldar arqyly nátıjege qandaı faktorlardyń áser etetinin kórsetýge kómektesti.
Lola Shakımova «Destrýktıvti dinı aǵymǵa ilesken jandarǵa psıhokorreksııalyq qyzmetti júzege asyrý» jáne «Destrýktıvti dinı aǵym kóshbasshylary qoldanatyn arbaý ádisteri» taqyryptarymen qatysýshylarǵa dástúrli emes dinı aǵymdardy ustanýshylarmen ońaltý jumysyn qalaı júrgizý kerektigin, olardyń synı oılaýyn, emosıonaldyq turaqtylyǵyn jáne áleýmettik baılanystaryn qalpyna keltirý praktıkasyn júrgizdi. Sonymen qatar, osy taqyryptar aıasynda teris aǵymnan shyǵý kezeńderi qarastyrylyp, dıagnostıka júrgizý tásilderi túsindirildi.
Sonymen qatar, semınarlar men trenıngter barysynda qatysýshylar tarapynan dáriskerlerge suraqtar qoıylyp, tujyrymdy jaýaptar alyndy.