«Ekin patrol» ereje elemegendi aıamaıdy

Oblystyq polısııa departamentinde baqylaý kamerasy barynsha kóp mundaı patrýl kóliginiń sany 11 edi. Bıyldan bastap taǵy 17 «ekin patrol» jolǵa shyqty.

Bul aqyldy polıseı kóligi kóbine respýblıkalyq mańyzy bar Qaraǵandy-Balqash, Qaraǵandy – Jezqazǵan, Astana – Qaraǵandy baǵytynda jáne Qaraǵandy – Qarqaraly, Temirtaý, Shahtınsk tasjoldarynda júredi.

– Byltyr 15 myńnan asa quqyq buzý­shylyq tirkeldi. Bıyl aqyldy patrýl kóligi tipti kóbeıdi. Toǵyz kameraly keshen kólik ústindegi túrli-tústi jarqyldatqysh qurylǵysyna ornatylǵan. Jol apaty kóbine jyldamdyqty shekten tys asyrýdan oryn alady. Buǵan qosa joldyń qarsy betine shyǵyp ketetinder de kóp. Mundaı aqyldy keshendi ornatýymyzdyń basty maqsaty – sol jol-kólik oqıǵalarynyń aldyn alý, – deıdi oblystyq polısııa de­partamenti ákimshilik polısııa basqar­masynyń aǵa ınspektory Rústem Ádenov.

Erejeni elemeıtinder áli de jetip artylady. Qaladaǵy kólik qozǵalysyn baqy­laıtyn qyraǵy kameralar kóbeıse de kólik apaty azaımaı tur. Oblystyq polısııa departamenti bastyǵynyń birinshi orynbasary Jasqaırat Qaıyrov jyl bastalǵaly beri oblys joldarynda 44 jol-kólik oqıǵasy tirkelip, 5 adam qaza taýyp, 58 adam túrli jaraqat alǵanyn aıtady. Sonyń aldyn alý úshin aqyldy keshen ornatqan patrýl kóliginiń sanyn kóbeıtip otyr.

«Ekin patrol» dep atalatyn bul júıe – aınalasyna «men kele jatyrmyn» dep belgi beretin jarqyldatqyshqa orna­tyl­ǵan «aqyldy» qondyrǵy. Onyń kamerasy 360 gradýsqa deıin sholyp, ózinen 70 metrge deıingi qashyqtaǵy avtokóliktiń nómirin jazyp alady. Kólik ústindegi «aqyldy» kameralar avtomatty jáne naq­ty ýaqyt rejimin­de birdeı jumys is­teı­di. Jol tártibiniń buzylǵany týraly má­limetterdiń bárin júrgizýshiniń qaje­tinsiz birden derek­qorǵa jiberip otyrady.

– Baqylaý júıesi aldy-artyndaǵy jyldamdyq mólsherin asyrǵan mashınalardy jazyp alyp otyrady jáne izdeýdegi avtokólikterdi anyqtaıdy. Radary 120 metrge deıingi radıýsta jumys atqarady. Buǵan qosa 70 metrge deıingi kólikterdi anyq kóre alady, – deıdi R.Ábenov.

Aǵa ınspektordyń aıtýynsha, jańa patrýl jol boıynda durys turmaǵan kó­likti de, joldaǵy jolaqtan asyp ketken nemese qyzyl belgige ótip ketken kólik­ti de «shart» etkizip túsirip alady. Jyl­jy­ma­ly baqylaý júıesiniń basqa kameralar­dan basty ereksheligi – qalanyń kez kelgen kóshesinde táýlik saıyn kezekshilik etedi.

Endi jol erejesin óreskel buzatyndar azaıady. Aıtpaı kelgen aıyppulǵa qalta­syn kim qaqtyra bersin? Kólik júrgizý­shi­lerdiń kóbi jol boıyndaǵy bir orynda ili­nip turǵan kameralardyń janynan ót­kende ǵana ereje saqtaıdy, al jyljy­ma­ly kamera kez kelgen jerde abaılap, ere­jeni barynsha eskerip júrýge úıretedi.

Qaraǵandy oblysynyń polısııa depar­tamenti bastyǵynyń birinshi orynbasary Jaı­qaırat Qaıyrovtyń aıtýynsha, osy jyldy Ishki ister mınıstrligi «Profı­laktıka jyly» dep bekitipti. Soǵan oraı Qara­ǵandyda jol qaýipsizdigin qadaǵalaý maqsa­tynda túrli is-shara úzdiksiz ótip turady.

– Jol qozǵalysyn únemi qadaǵalaý úshin polısııa departamenti aqpan aıynda «Qaýipsiz jol» respýblıkalyq jedel-profılaktıkalyq is-sharasyn ótkizdi. Is-shara kezinde oblys joldarynda polısııa jasaqtarynyń sany artyp, tártip saqshylary reıd júrgizdi. Mundaǵy maq­sat – kólik quraldary ıeleriniń tár­tip­ti saqtaýy. «Zań men tártip» qaǵı­da­tyn barshamyz ustanýymyz kerek. Polısııanyń jumysyna engizilip jatqan jańashyldyqtar halyq­tyń tynyshtyǵy men qoǵam qaýipsizdigin tıis­ti deńgeıde qamtamasyz etedi. Qabyldan­ǵan sharalar jol-kólik oqıǵalarynyń sanyn azaıtýǵa septigi tıedi. Patrýldik min­det­terdi ońtaılandyrý arqyly quqyq qor­ǵaý organdary qyzmetkerleriniń jumy­sy jańa deńgeıge kóteriledi. Sondaı-aq polısııa qyzmetin avtomattandyrýǵa, polısııa jumysyn baqylaýǵa, derekterge qolje­timdilikti, basqarýshylyqty, dıspetcherleýdi jaqsartýǵa kómektesedi. Al tártip saqshy­lary óz kezeginde halyq­tyń múddesine adal qyzmet etedi, – deıdi J.Qaıyrov.

Qaraǵandy oblysy