Premer-mınıstr Oljas Bektenov Memleket basshysynyń 2024 jylǵy aqpanda Úkimettiń keńeıtilgen otyrysynda bergen ekonomıkany sıfrlyq transformasııalaýǵa qatysty tapsyrmalaryn júzege asyrý máseleleri jóninde keńes ótkizdi, dep habarlaıdy Egemen.kz Úkimettiń baspasóz qyzmetine silteme jasap.
Ulttyq sıfrlyq qarjy ınfraqurylymyn damytý, sıfrlyq teńge arqyly bıýdjet qarajatyn jumsaýdyń qadaǵalanýyn jáne tıimdiligin arttyrýǵa baǵyttalǵan jobalardy iske asyrýdyń aǵymdaǵy jaǵdaıy men aldaǵy josparlary qaraldy. QR Ulttyq banki tóraǵasy Tımýr Súleımenov, Sybaılas jemqorlyqqa qarsy is-qımyl agenttigi tóraǵasy Ashat Jumaǵalıdiń qatysýymen qarjy ekojúıesiniń ashyqtyǵyn qamtamasyz etý, tutynýshylar quqyǵyn qorǵaý, alaıaqtyq tranzaksııalarmen kúresý sharalary talqylandy.
Ulttyq bank tóraǵasynyń keńesshisi Bınur Jálenov qarjy ınfraqurylymynyń negizgi quramdas bólikterin – bankaralyq tólem kartochkalary júıesin, Open API, Antıfrod-ortalyq, sıfrlyq teńgeni damytý tásilderin usyndy.
«Búgingi tańda Bank júıeleri arqyly elimizdegi barlyq tólem aınalymynyń 90%-yn jáne sıfrly bıometrııalyq sáıkestendirýge 30 mln-ǵa jýyq suranysty óńdelýde. Antıfrod-ortalyq ýaqtyly buǵattaǵan zańsyz tranzaksııalar kólemi 2 mlrd teńgeni qurady, jalpy 36 myńnan astam oqıǵa anyqtaldy. Tehnologııalyq platformaǵa 108 uıym, onyń ishinde barlyq ekinshi deńgeıli bank, iri tólem uıymdary men mıkro qarjy uıymdary qosylǵan. Sondaı-aq bıylǵy shilde aıynda ekinshi deńgeıli banktermen birlesip, QR arqyly bankaralyq tólem qyzmetin iske qosý josparlanyp otyr», delingen habarlamada.
Sonymen qatar memleket qarajatynyń jumsalýyn qadaǵalaý maqsatynda 2024 jyly iske qosylǵan sıfrlyq teńgeni qoldanatyn pılottyq joba barysy talqylandy.
Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı sıfrlyq teńge jobasy sybaılas jemqorlyqqa barynsha beıim salalarda synaqtan ótip jatqanyn aıtty.
«Búginde barlyǵy 250 mlrd-qa jýyq sıfrlyq teńge aınalymǵa engizilgen. Ázirleýshiler ár aqsha birligine biregeı sıfrlyq belgilerdi baılanystyrýdy qarastyrady, bul qarajattyń bólinýden bastap tolyq ıgerilýine deıingi barlyq kezeńde qoldanylýyn baqylaýǵa múmkindik beredi. Atalǵan ádistiń AО́K-tegi tıimdiligi Aqmola oblysyndaǵy sharýa qojalyqtarynyń qatysýymen «Aýyl amanaty» baǵdarlamasyn iske asyrý barysynda qaraldy. Arnaıy baǵdarlamalanǵan sıfrlyq teńge fermerlerdiń mal basyn satyp alýyna nesıe berý kezinde paıdalanyldy ári jalǵan mámileler múmkindigin joıyp, prosestiń tolyq ashyq ótýin qamtamasyz etti», delingen habarlamada.
Bekitilgen Jol kartasy sheńberinde jobany iske asyrý bıyl Qaraǵandy, Pavlodar jáne Atyraý oblystarynda temirjol jáne avtomobıl joldaryn salý kezinde jalǵasady. Aıta keteıik, otandyq kásipkerler aprobasııaǵa óz erkimen qatysady, bul olardyń Open Book qaǵıdaty boıynsha bıznesti ashyq júrgizýge beıildiligin kórsetedi.
Sonymen qatar sıfrlyq teńge bazasynda ákimshilendirý tıimdiligin arttyrý jáne QQS qaıtarý rásimin jedeldetý úshin «Sıfrlyq QQS» pılottyq jobasy iske qosyldy.
Premer-mınıstr Ulttyq sıfrlyq qarjy ınfraqurylymynyń aýqymyn odan ári keńeıtýdiń, sondaı-aq bıýdjet qarajatyn birshama únemdeýdi qamtamasyz etetin sıfrlyq teńgeni neǵurlym keńinen paıdalanýdyń mańyzdylyǵyn atap ótti.
«Memleket basshysy atap ótkendeı, sıfrlyq teńge arqyly «aqshany tańbalaý jáne boıaý» bıýdjet qarajatynyń jumsalýyn baqylaý tetigi bolýy múmkin. Jalpy, Ulttyq bank qarjy júıesin sıfrlyq transformasııalaý boıynsha basqa da múddeli memlekettik organdarmen birlesip aýqymdy jumys atqarýda. Sıfrlyq teńgege keletin bolsaq, talqylaýdyń negizgi taqyryby retinde men sizderdiń barlyq bastamalaryńyzdy qoldaımyn. Sıfrlyq teńgeni engizý jańa tehnologııalyq ahýaldy eskere otyryp, qarjylandyrý úderisterin ońtaılandyrýǵa kómektesetinine nazar aýdarý qajet. Bıznes-úderister de ózgerip, ashyq bolýy kerek. Kásipkerlerge qatysty mynadaı qaǵıdany ustanǵan jón: bıýdjet aqshasymen jumys isteseńiz – ashyq bolyńyz. Ony qaıda jumsaıtynyńyzdy jáne jetkizýshiler men merdigerlerdiń tolyq tizbegin ashyp kórsetińiz. Sondaı-aq sıfrlyq teńgeniń pılottyq jobasyn keńeıtý qajet», dep atap ótti Oljas Bektenov.
Keńes qorytyndysy boıynsha Sıfrlyq damý, ınnovasııalar jáne aeroǵarysh ónerkásibi, Qarjy, О́nerkásip jáne qurylys, Ulttyq ekonomıka mınıstrlikteri jańa sıfrlyq quraldar qoldanýdy retteıtin zańnamaǵa túzetýler pysyqtalyp, sondaı-aq elektrondy aqshany baǵdarlamalaý ádisnamasy ázirlenedi.