Premer-mınıstr Oljas Bektenovtiń tóraǵalyǵymen ótken Úkimet otyrysynda týrızmniń biryńǵaı sıfrlyq ekojúıesin qurýdyń mańyzdylyǵy aıtyldy. Atalǵan másele boıynsha Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev baıandama jasady, dep habarlaıdy Egemen.kz.
«Sıfrlandyrý – týrıstik salany damytýdyń taǵy bir mańyzdy baǵyty. Týrızmniń biryńǵaı sıfrlyq ekojúıesin qurý máselesi pisip-jetildi. Osy oraıda TravelStan qosymshasynyń jasalýy – óte ózekti. Servıs naryqtyń barlyq qatysýshylaryn biriktire otyryp, týrısterdiń sapaly ári senimdi qyzmetterge qol jetkizýine kepildik beredi. О́tken jyly Your tourist pass jobasy bastaldy. Bul qural QR-kodty skanerleý arqyly ulttyq týrıstik portalǵa, eQonaq kóshi-qon servısine, taksı qyzmetine jáne basqa da paıdaly resýrstarǵa biryńǵaı qol jetkizýdi qamtamasyz etedi. Buǵan qosa, álemniń kóptegen elderinde keńinen tanymal Tax Free pılottyq jobasy da jaqsy nátıje kórsetip otyr», dedi Oljas Bektenov.
Premer-mınıstr Týrızm jáne sport mınıstrligine Sıfrlyq damý, ınnovasııalar jáne aeroǵarysh ónerkásibi mınıstrligimen birlesip, úsh aı merzimde týrızmniń biryńǵaı sıfrlyq ekojúıesin qurý jónindegi naqty is-sharalar josparyn bekitýdi tapsyrdy. Kýrorttyq aımaqtar men tabıǵı parkterdiń bas josparlaryn sıfrlandyrýǵa erekshe nazar aýdarý qajet. Sondaı-aq ulttyq týrıstik portalǵa kirýge múmkindik beretin QR-kodtardy áýejaılarda, vokzaldar men shekara beketterinde, týrıster kóp jınalatyn jerlerde ornalastyrý qajettigi atap ótildi.
Sonymen qatar Týrızm jáne sport mınıstrliginiń aldyna Qarjy mınıstrligimen birlesip, «Tax Free» tetigin engizýdiń naqty algorıtmin ázirleý mindeti qoıylǵan. Bul quraldy týrısterge yńǵaıly bolýy úshin, ásirese áýejaılarda qarajatty qaıtarý tetigin iske asyrý úshin tolyǵymen sıfrlandyryp, avtomattandyrý kerek.
Aıta keteıik, vıza máselesine erekshe nazar aýdaryldy. О́tinimder berýdiń barlyq rásimderin tolyǵymen sıfrlandyrý arqyly Neo Nomad Visa-ny tanymal etý tapsyryldy. Týrızm jáne sport mınıstrligi Mádenıet, Syrtqy ister mınıstrlikterimen birlesip, el ishinde jáne shetelderde Qazaqstannyń týrıstik áleýeti týraly belsendi aqparattyq naýqan júrgizýdi qamtamasyz etý mindetteldi.